د ملګرو ملتونو علمي، کلتوري او تعلیمي سازمان (یونسکو) او د ملګرو ملتونو د ښځو څانګې (UN Women) د ښځو او نجونو په وړاندې د طالبانو محدودیتونو ته په غبرګون کې، د دې هېواد له ښځو په ملاتړ او ورسره پیوستون ټینګار وکړ.
رخشانه: دې دوه بنسټونو نن (یکشنبې د کب ۱۷ مه) د مارچ اتمه د ښځو د پیوستون نړیوالې ورځې په مناسبت، په افغانستان کې د ښځو او نجونو وضعیت غیرعادي وباله او ویې ویل، چې هغه «عادي مه بولۍ.»
د ملګرو ملتونو علمي، کلتوري او تعلیمي سازمان (یونسکو) په یوه بیانیه کې ویلي، په افغانستان کې میلیونونه نجونې د زده کړو، ودې او د راتلونکې د جوړلو له فرصت څخه محرومې دي.
یونسکو دغه وضعیت غیرعادي وباله او د افغان ښځو او نجونو په ملاتړ او ورسره په پیوستون یې ټینګار کړی دی.
دې بنسټ افغانستان کې د ښځو او نجونو په وړاندې د طالبانو محدودیتونو ته په اشارې زیاته کړې، بدلون اوس هم ممکن دی.
افغانستان کې د ملګرو ملتونو د ښځو څانګې (UN women) هم په خپله اېکس پاڼه په یوه بیانیه کې لیکلي، افغانستان کې له عمومي فشا د ښځو حذف عادي مه بولۍ.
په بیانیه کې راغلي: «عامه ځایونه چې یوه ورځ به خلک په کې راټولېدل، اوس د ښځو او نجونو پر مخ تړلي دي.»
بیانیه کې راوړل شوي، کله چې نړیوال د افغان ښځو تر څنګ ودرېږي، بدون بیا هم ممکن دی.
په دې بیانیه کې ویل شوي، د قانون حاکمیت په ټوله نړۍ کې د کمزوري کېدو په حال کې دی او ښځې او نجونې د هغې لګښت پرې کوي.
یاد بنسټ ویلي، جګړې، ځپنې او د شاتګونو څپې، هغه نظامونه چې د خلکو د خوندیتوب لپاره رامنځ ته شوي دي، کمزوري کوي.
د ملګرو ملتونو د ښځو څانګې ټینګار کړی، چې «په قانون، نظامونو او د ښځو او نجونو په حقیقي ژوند کې د اغېزمن عدالت» لپاره هڅه کوي.
