د بیان د آزادۍ مرکز (FSC) اعلان کړی، چې افغانستان کې پر رسنیو او خبریالانو د طالبانو د محدودیتونو له امله، دا مهال په ۲۰ ولایتونو کې هېڅ ښځینه خبریاله شتون نه لري.
رخشانه: دې بنسټ نن (یکشنبې د کب ۱۷ مه) د مارچ اتمه د ښځو د پیوستون نړیوالې ورځې په مناسبت په یوه بیانیه کې لیکلي، واک ته د طالبانو تر رسېدو وروسته پر خبریالانو سخت محدودیتونه او منظمه ځپنه پلې شوې ده.
په بیانیه کې راغلي، دغو اقداماتو کې نیونې، فزیکي تاوتریخوالی او سخت محدودیتونه شامل دي، چې د راپور ورکولو لپاره یې د دوی وړتیا کمه کړې. ډېری ښځینه خبریالانې ګواښل شوې او په ځینو مواردو کې زنداني شوې هم دي.
د بیان د آزادۍ مرکز زیاته کړې، د دې محدودیتونو په پایله کې، افغان ښځینه خبریالانې اوس د دایمې ویرې، اقتصادي ستونزو او رواني زیانونو په فضا کې ژوند کوي.
دغه بنسټ ویلي، دا مهال په ټول هېواد کې ۱۹۰ ښځینه خبریالانې فعالیت لري، په داسې حال کې، چې د کابل له سقوط وړاندې دغه شمېره له ۲ زرو څخه زیاته وه.
د دې بنسټ موندنې ښيي، چې کابو شاوخوا ۸۶ سلنه ښځینه خبریالانو خپلې دندې له لاسه ورکړې او یا نور اجازه نه لري، چې د رسنیو په برخه کې آزادانه کار وکړي.
بیانیه وايي، په عمومي ژوند کې د ښځو پر ګډون د طالبانو محدودیتونو د راپور ورکولو لپاره، د هغوی وړتیا له وړاندې محدوده کړې ده.
د بیان د آزادۍ مرکز ټینګار کړی، چې په ډېری ولایتونو کې خبریالان په ناپېژانده توګه کار کوي یا مطالب له خپل نامه پرته خپروي، تر څو د طالبانو له غچ اخیستنې خوندي پاتې شي.
دې مرکز ویلي، د سختو شرایطو او د طالبانو د محدودیتونو سره سره، په جلا وطنۍ کې افغان ښځینه خبریالانې خپل کار ته دوام ورکوي.
هغوی د هغه موضوعاتو په اړه راپورونه ورکوي، چې د افغانستان د ننه غلي کړای شوي او د ښځو غږونه د نړیوالو تر غوږونو رسوي.
د بیان د آزادۍ مرکز وايي، په جلاوطنۍ کې خبریالان دا مهال د افغانستان په اړه د راپور ورکولو یوه وروستۍ خپلواکه لاره باندې بدل شوي دي.
د دې مرکز په وینا، هغه ستونزې چې افغان ښځینه خبریالانې ورسره مخ دي، د نړیوالې ټولنې تل پاتې پیوستون او پاملرنې ته اړتیا لري. دولتونه، نړیوال سازمانونه او رسنیز بنسټونه باید هڅه وکړي، چې د خبرلانو د ملاتړ لپاره ځانونه پیاوړي کړي.
د بیان د آزادۍ مرکز ویلي، په افغانستان کې د ښځینه خبریالانو سره د پیوستون په پار د هغوی تر څنګ درېږي، تر څو هغوی د افغان ښځو په اړه د راپورونو ورکولو او کیسو ثبتولو ته دوام ورکړي.
