د بشري حقونو فعالې او د نوبل جایزې ځوانکې ګټوونکې ملالې یوسفزۍ له نړیوالو مشرانو غوښتي، چې د افغان ښځو او نجونو تر څنګ ودرېږي او جنستي توپیر په رسمیت وپېژني.
رخشانه: یوسفزۍ تېره ورځ (یکشنبې د کب ۱۷ مه) د مارچ اتمې د ښځو د پیوستون نړیوالې ورځې په مناسبت په ملګرو ملتونو کې د خپلې وینا پر مهال، د هغه ماشومانو او کورنیو په اړه خبرې وکړې، چې تاوتریخوالی یې لیدلی دی.
هغې په دې ناسته کې د نړۍ له مشرانو وغوښتل، چې د افغان نجونو تر څنګ ودرېږي او د طالبانو له لوري د ښځو او نجونو سیستماتیک له منځه وړل، د جنسیتي توپیر په توګه په رسمیت وپېژني.
یوسفزۍ ویلي: «نن په مات زړه دلته ولاړه یم، له دې وړاندې مې هېڅ کله نه وو لیدلي، چې دا ټول ماشومان دې له جګړې او تاوتریخوالي وکړېږي، ټپیان شي او د ځواب نه ورکوونکو مشرانو په لاس ژوند وبایلي.»
هغې د افغان ښځو او نجونو په وړاندې د طالبانو محدودیتونو ته په اشارې و ویل، هغوی «کابو پنځه کاله کېږي، چې د طالبانو تر ظالمانه ولکې لاندې ژوند کوي.»
همدارنګه یوسفزۍ ویلي: «په نړۍ کې د ښځو د حقونو د شاتګ لیدونکي یو، هغه حقونه چې نسلونو یې د لاس ته راوړلو لپاره مبارزه کړې. دا وضعیت د افغانستان په پرتله په بل هېڅ ځای کې ښکاره نه دی.»
نوموړې د افغان ښځو او نجونو په وړاندې د طالبانو محدودیتونو ته په اشارې سره و ویل: «نن په افغانستان کې د ښځې یا لور وهل ټکول د نارینه له خوا قانوني دي.»
د بشري حقونو دې فعالې ویلي، کابو پنځه کاله کېږي، چې طالبانو ښځې او نجونې له عمومي ژوند څخه لرې کړې او نړۍ د دې وضعیت په وړاندې یا مخ اړولی یا د کلتور او دین له نامه ناوړه ګټه اخلي.
هغې ټینګار کړی، چې د طالبانو اقدامات «په واقعي نامه جنسیتي توپیر وبولو او باید هغه په څرګنده توګه په نړیوالو حقونو کې د جرم په توګه په رسمیت وپېژنو.»
د یوسفرۍ په وینا، په قانون کې د جنسیتي توپیر په رسمیت پېژندنې سره کولی شو، له افغان ښځو او نجونو ساتنه وکړ او د راتلونکو نسلونو لپاره د دې وروستي ناورین د تکرار مخنیوی وکړو.
نوموړې ټینګار کړی، چې افغان ښځې او نجونې د «پوځي مداخلې» نه غواړي، هغوی په قانون کې د په رسمیت پېژندولو غوښتونکې دي، تر څو د عدالت اوږده لار پیل شي.
