د افغانستان د بشري حقونو د خپلواک کمېسیون پخوانۍ مشرې سیما سمر وايي، له زده کړو د افغان نجونو منع کول هغوی جبري ودونو ته اړباسي.
رخشانه: سمر دغه څرګندونې یکشبنې د (کب ۱۷ مه) په هغه غونډه کې چې د مارچ اتمې د ښځو د پیوستون نړیوالې ورځې په مناسبت د امریکا د ماسوچوست ایالت د بوستون ښار د «نیوانګلند حوزې هزاره ګانو» له خوا جوړه شوې وه بیان کړې دي.
هغې په دې پروګرام کې د افغان ښځو او نجونو په وړاندې د طالبانو پراخو محدودیتونو ته اشاره کړې، هغه یې د جنسیتي توپیر څرګنده بېلګه بللې او «د بشريت په وړاندې جرمونو په کنوانسیون کې د جنسیتي توپیر د جرم په توګه د ثبت او په رسمیت پېژندنې» ټینګار کړی دی.
د بشري حقونو د کمېسیون پخوانی مشرې زیاته کړې: «طالبانو په دوامداره او مظنم ډول افغان ښځې له خپلو حقونو بې برخې کوي او دا د بشري حقونو څخه سرغړاوی دی.»
هغې د طالبانو له لوري د بشري حقونو د سرغړاویو په ثبت او مستند کولو ټینګار وکړ وايي، د بشري حقونو د سرغړاویو په تړاو په نړیواله محکمه کې د طالبانو ځواب ویوونکي کول مستند او باروي اسنادو ته اړتیا لري.
نوموړې د طالبانو د محکمو جزايي اصول نامې ته هم اشاره کړې وايي، د دې قانون پر بنسټ هېڅ ښځه حق نه لري، چې د خاوند له اجازې پرته د پلار کره لاړه شي. سمر دغه سند د افغانستان د راتلونکي نسل په حق کې لویه جفا وبلله.
دغه راز سمر ټینګار وکړ، چې د بې عدالتیو په وړاندې نه باید چوپ پاتې شو او په پوهاوي او دقیقې اطلاع رسولو سره کولی شو شرایط بدل کړو.
د بشري حقونو فعالې مستوره شفايي هم په دې پروګرام کې د افغان ښځو او نجونو په وړاندې د طالبانو پراخو محدودیتونو ته اشاره وکړه او هغه یې یو ریښتینی جنسیتي توپیر وباله.
هغې له نړیوالې ټولنې وغوښتل، چې د افغان ښځو وضعیت او عدالت ته د هغوی لاسرسی د نړیوالو خبرو اترو لومړیتوب کړي.
