د خبریالانو ملي ورځې د کب اووه ویشتمې سره سم، کونړ ولایت کې د «سند غږ» په نوم خصوصي راډیو خپلې خپرونې په رسمي ډول پیل کړې دي.
رخشانه: دې غږیزې رسنۍ نن (چهارشنبې د کب ۲۷ مه) خپلې خپرونې پیل کړې دي.
د دې راډیو مسوولین وايي، دا رسنۍ به د اف ام په ۸۹.۵ څپو د ورځې ۱۸ ساعته خپرونې ولري او د ټولنیزو شبکو له لارې به ۲۴ ساعته خپل فعالیت ته دوام ورکړي.
د سند غږ راډیو مرستیال عبدالقدوس شمس وايي، دا غږیزه رسنۍ د زده کړو، خبرونو او عمومي پوهاوي د اړتیاو پوره کولو په موخه رامنځ ته شوې او هڅه کېږي، چې کره، ګړندي او بې پرې معلومات وړاندې کړي.
د هغه په وینا، دا خصوصي راډیو، د خبرونو، شننو، زده کړې او کلتور په برخو کې ځانګړي موضوعات، ښځو، ماشومانو او ځوانانو ته وړاندې کوي.
دا سیمه ییزه راډیو داسې مهال کونړ کې خپل رسنیز فعالیت پیلوي، چې طالبانو په تېرو څه باندې څلورو کلونو کې، پر رسنیو او رسنیزو فعالیتونو پراخ محدودیتونه لګولي دي.
د افغانستان د خبریالانو مرکز نن په یوه راپور کې لیکلي، چې د طالبانو تر واک لاندې افغانستان کې د رسنیو له خپلواکۍ سرغړونې ۲۰ سلنه زیاتې شوې دي.
د خبریالانو د مرکز په راپور کې راغلي، طالبانو په تېر یوه کال کې پر رسنیو کنټرول زیات کړی او په هېواد کې د رسنیو ځپل او سانسور په بېمخینې توګه زیاتوالی موندلی دی.
د دې راپور پر اساس، په ۱۴۰۴ کال کې لږ تر لږه ۲۰۷ ځلې د رسنیو له آزادۍ سرغړونې او د خبریالانو په وړاندې تاوتریخوالی ثبت شوی، چې په کې د دوه خبریالانو وژل کېدل، د یوه خبریال ټپي کېدل، ۱۸۳ ځلې ګواښل، ۲۱ ځلې د خبریالانو او رسنیزو فعالانو نیول شامل دي.
