د افغانستان د بشري حقونو مرکز (AHRC) کابل کې د روږدو کسانو د درملنې په مرکز د پاکستان هوايي برید غندلی او د دې پېښې په اړه یې د خپلواکو پلټنو غوښتنه کړې ده.
رخشانه: دې مرکز نن (چهارشنبې د کب ۲۷ مه) د یوې اعلامیې په خپرولو سره ویلي، د روږدو د درملنې په مرکز د پاکستان په هوايي بریدونو کې لسګونه غیرنظامیان له منځه تللي دي.
په اعلامیه کې راغلي، دا برید پر یوه غیر نظامي ځای برید بلل کېږي او د نړیوالو بشردوستانه او نړیوالو بشري حقونو په اړه یې جدي اندېښنې رامنځ ته کوي.
اعلامیه کې راوړل شوي، د امید د روږدو د درملنې مرکز په نښه کول، له کومې قانوني توجیه پرته کېدای شي د نړیوالو حقونو جدي سرغړونه وي او کولی د بشریت پر وړاندې او جنګي جنایت شي.
د افغانستان د بشري حقونو کمېسیون له «ملګرو ملتونو، د بشري حقونو بنسټونو، بشر دوستانه آژانسونو او ټولو واک لرونکو نړیوالو بنسټونو غواړي، چې د دې وحشیاینه برید په اړه، بېړنۍ، خپلواکه، بې پرې او رڼې پلټنې تر سره کړي.»
دې بنسټ ویلي، «مسوول کسان له هغې جملې هغه کسان چې د برید امر یې کړی، پلان کړی یې دی یا یې تر سره کړی، باید د نړیوالو قوانینو سره سم په نښه او ځواب ته راکاږل شي.»
د افغانستان د بشري حقونو کمېسیون دغه راز اغېزمنې سیمې او همدارنګه د قربانیانو، ژوندي پاتې شویو، شاهدانو، طبي پرسونل او دې طبي مرکز پورې اړوند یکارډونو ته د سمدستي، بې خنډه، بشپړ او خوندي لاسرسي غوښتنه کړې ده.
د افغانستان د بشري حقونو د کمېسیون مشرې سیما سمر ویلي، چې «د نړیوالو قوانینو له مخې، پر ملکي وګړو د درملنې او طبي ځواک ورکولو په مرکزونو بریدونه په کلکه منع دي.»
سمر زیاته کړې، د دې ډول تاوتریخوالي په وړاندې چوپتیا او خوندیتوب یوازې انساني کړاو لا ژوروي او د افغانستان د خلکو لپاره ماتېدونکی ملاتړ نور هم له منځه وړي.
هغې ټينګار کړیو چې نړیواله ټولنه بید له ځنډ پرته د حقایقو روښانه کولو، د غیرنظامیانو د خوندیتوب او تضمین د ځواب وینې لپاره اقدام وکړي.
د پاکستان دولت د دوشنبې په شپه شاوخوا ۹ بجې د کابل ښار د څرخي پله په سیمه کې د روږدو د درملنې په امید مرکز هوايي برید وکړ.
د طالبانو په وینا، د دې برید په ترڅ کې لږ تر لږه ۴۰۰ کسان وژل شوي او له ۲۵۰ زیات ټپیان شوي دي. طالبانو ویلي، پاکستان غیرنظامیان په نښه کړي دي.
خو د پاکستان دولت له برید وروسته اعلان وکړ، چې د پاکستاني طالبانو یا ټي ټي پي په نظامي مرکز او د وسلو زېرمتون یې په نښه کړی دی.
دې برید د سیاسي څېرو او بشري حقونو د بنسټونو پراخ غبرګونونه راپارولي دي.
