په افغانستان کې د ملګرو ملتونو د بشري مرستو د همغږۍ دفتر (اوچا) اعلان کړی، چې د طالبانو او پاکستان تر منځ د دریو اونیو جګړو په ترڅ کې ۷۶ تنه وژل شوي او ۲۱۳ نور ټپیان شوي دي.
رخشانه: دې بنسټ نن (چهارشنبې د کب ۲۷ مه) په خپله اېکس پاڼه د یوې خبرپاڼې په خپرولو سره ویلي، د طالبانو او پاکستان تر منځ جګړه دریمې اوونۍ ته د ننه شوې او د کمښت هېڅ نښه یې نه لیدل کېږي.
اوچا وايي، د روان کال د فبروۍ د ۲۶ مې او د مارچ ۱۷ مې تر منځ موده کې د دې جګړو له امله ۲۱۳ تنه ټپیان شوي، چې ۵۹ ښځې او ۱۰۴ تنه ماشومان په کې شامل دي.
دغه بنسټ د دوشنبې په شپه کابل ښار کې د روږدو کسانو د درملنې په مرکز د پاکستان هوايي برید ته په اشارې ویلي، په دغه برید کې د مرګ ژوبلې څېړنې روانې دي.
طالبان ادعا کوي، چې د پر دغه مرکز د پاکستان په هوايي برید کې شاوخوا ۴۰۰ تنه وژل شوي او ۲۵۰ نور ټپیان شوي دي.
دغه راز اوچا لیکي، چې په دې موده کې د دواړو لورو تر منځ نښتې زیاتې شوې او پاکستان د افغانستان په لږ تر لږه لسو ولایتونو بریدونه تر سره کړي دي.
دې بنسټ زیاته کړې، د لومړنیو راپورونو له مخې ۱۱۵ زره کسان چې ۱۶ زره او ۴۰۰ کورنۍ کېږي، د دې جګړو له امله بې ځایه شوي دي.
په افغانستان کې د ملګرو ملتونو د بشري مرستو د همغږۍ دفتر زیاته کړې، بې ځایه شوي کسان، د خوراکي توکو، سرپناه او ګرموونکو وسایلو ته اړتیا لري.
د دې بنسټ په وینا، د طالبانو او پاکستان تر منځ د جګړو له امله، په جګړیزو سیمو کې له ۳۱۸ څخه زیات کورونه په جګړه کې ویران او یا سخت زیانمن شوي دي.
