د افغانستان لپاره د ښځو بنسټ اعلان کړی، چې د «یووالي او باور پر لور» دوه ورځنۍ دویمه دوريي ناسته، د طالبانو د مخالفینو، ګوندونو د استازو، سیاسي او مدني فعالانو په ګډون، لندن ښار کې جوړه شوه.
رخشانه: دغه ناسته نن (سه شنبې د وري ۴ مه) چې د روان میلادي کال د مارچ له ۲۴ مې سره سمه ده، پیل او سبا د مارچ ۲۵ مه پای ته رسېږي.
د دې ناستې کوربه د افغانستان لپاره د ښځو بنسټ ویلي، دا غونډه د افغانستان اوسني بحران ته د رسېدګۍ په خاطر جوړه شوې ده.
د دې بنسټ په اعلامیه کې راغلي، د دې ناستې په لومړۍ ورځ د افغانستان د ګوندونو او سیاسي- مدني جریانونو په ګډون د بېلابېلو ډلو تر منځ د همکارۍ، همغږۍ، د متقابل درک او باور فضا د رامنځ ته کولو په اړه خبرې اترې وشوې.
اعلامیه کې راوړل شوي «د دې ناستې اصلي تمرکز به پر هغه رغنده بحثونو وي، چې د افغانستان د راتلونکې لپاره ګډ لید لوری لري، له هغې جملې هغه لومړیتوبونه، چې کولی شي له ګډونوالو سره مرسته وکړي، تر څو داسې راتلونکې انځور کړي، چې د افغانستان د خلکو وړ وي.»
د افغانستان لپاره د ښځو بنسټ ویلي، د ناستې په دویمه ورځ به د ديپلوماتانو، سفیرانو، د اعیان مجلس د غړو، د برېتانیا د استازو، مدني ټولنو د بنسټونو او په برېتانیا کې مېشت د فکر خونو، چې د افغانستان په مسله کې ښکېل دي، په ګډون له نړیوالو شریکانو سره خبرې اترې وشي.
په دې ناسته کې د پاکستان استازو، له طالبانو سره په جګړه کې د ښکېل دولت په توګه ګډون نه درلود.
د افغانستان لپاره د ښځو بنسټ ویلي، دا غونډه د افغانستان د کلیدي لومړیتوبونو د پیاوړتیا او د ګډونوالو او نړیوالو سیالانو تر منځ د خبرو اترو په موخه جوړه شوې ده.
دې بنسټ تمه ښودلې، چې «دا خبرې اترې به د افغانستان د راتلونکې لپاره د هغه عادلانه و پراخ بنسټ کړنلارې سره، چې ښځې په کې مرکزي او مانا لرونکی رول ولري» مرسته وکړي.
