د ملګرو ملتونو یو شمېر کارپوهانو، د طالبانو او پاکستان تر منځ د جګړو د پای، تلپاتې سولې او بېړني اوربند غوښتنه کړې ده.
رخشانه: د ملګرو ملتونو کارپوهانو نن (سه شنبې د وري ۴ مه) په یوه اعلامیه کې د جګړې له ښکېلو لورو غوښتي، چې تازه اوربند وکړي او د سولې یوه تړون ته ورسېږي.
د ملګرو ملتونو کارپوهانو ویلي: «موږ له پاکستان اوطالبانو غواړو، چې یوه دایمي اوربند ته ژمن شي، د شخړې اصلي ریښې حل کړي او د نړیوالو قوانینونو سرغړونو ته ځواب وینه تضمین کړي.»
ملګرو ملتونو لیکلي، چې د ۲۰۲۶ میلادي کال د فبرورۍ د ۲۶ مې نه تر اوسه، لږ تر لږه ۲۸۹ ملکي افغانان وژل شوي او ټپیان شوي، چې ۷۶ وژل شوي او ۲۱۳ نور ټپیان شوي دي.
ملګرو ملتونو زیاته کړې، د طالبانو او پاکستان تر منځ جګړو له امله، په افغانستان کې له ۱۱۵ زره زیات کسان بې ځایه شوي دي.
د ملګرو ملتونو کارپوهانو کابل ښار کې د روږدو کسانو د درملنې په مرکز «امید کمپ» د پاکستان هوايي برید ته په اشارې ویلي، په دې برید کې ښايي سلګونو کسانو ته مرګ ژوبله اوښتې وي.
دوی دغه برید غندلی او د دې پېښې د قربانیانو له کورنیو سره یې خواخوږي ښودلې ده. د کارپوهانو ډلې د دې جګړې له امله د ملکي وګړو د مرګ ژوبلې، د خلکو د بې ځایه کېدو او ښوونځیو د تړل کېدو په اړه اندېښنه ښودلې ده.
د ملګرو ملتونو کارپوهانو د جګړې له ښکېلو اړخونو غوښتي، چې نړیوالو، بشري او بشردوستانه حقونو ته درناوی وکړي او ملکي وګړو او غیرنظامي بنسټونو ته له زیان رسولو ډډه وکړي.
هغوی ویلي «ځینې بریدونه چې د ملکي وګړو په مرګ ژوبله تمام شوي، ښايي نړیوال بشردوستانه حقونه یې نقض کړي وي.»
د ملګرو ملتونو کارپوهانو د ټولو ادعا شویو سرغړونو په اړه د سمدستي، خپلواکه او رڼو څېړنو، د عامیلینو د حساب ورکولو او د نړیوالو معیارونو سره سم د قربانیانو لپاره د تاوان ورکولو غوښتنه کړې ده.
طالبان ادعا کوي، چې د دوشنبې په شپه د کابل ښار د څرخي پله په سیمه کې د «امید» په نوم د روږدو کسانو د درملنې په مرکز د پاکستان په هوايي برید کې شاوخوا ۴۰۰ کسان وژل شوي او ۲۵۰ نور ټپیان شوي دي.
خو د پاکستان دولت له برید وروسته اعلان وکړ، چې دوی د پاکستاني طالبانو ټي ټي پي اړوند یو نظامي مرکز او د وسلو زېرمتون په نښه کړی دی. دې برید د سیاسي څېرو او بشري حقونو د بنسټونو پراخ غبرګونونه له ځان سره درلودل.
له دې بریده د یوې اوونۍ په تېرېدو، تر اوسه پورې د مرګ ژوبلې کره شمېره نه ده خپره شوې.
