د ملګرو ملتونو علمي، کلتوري او ښوونیز سازمان (یونسکو) اعلان کړی، چې په نړۍ کې له زده کړو پاتې ماشومانو شمېر مخ پر زیاتېدو دی.
رخشانه: دې بنسټ نن (چهارشنبې د وري ۵ مه) په یوه راپور کې لیکلي، د هغو ماشومانو او تنکیو ځواکونو شمېر چې له زده کړو محروم دي، د اووم کال لپاره یې زیاتوالی کړی او ۲۷۳ میلیون تنو ته رسېدلی دی.
یاد سازمان ویلي، دغه زیاتېدنه، د نفوس د زیاتوالي، بحرانونود شتون او د بودیجې د کموالي له امله د زده کړو په برخه کې رامنځ ته شوې ده.
د دې بنسټ په وینا، په ټوله نړۍ کې له هرو شپږو ماشومانو، چې د ښوونځي د عمر دي، یو تن یې له زده کړو محروم دی او له هرو دریو زده کوونکو یوازې دوه یې بریالي کېږي، چې د زده کړو منځنۍ دوره پای ته ورسوي.
یونسکو د دې وضعیت پر دوام اندېښنه ښودلې وايي، هر کال په ټوله نړۍ کې ګڼ شمېر ځوانان له زده کړو محرومېږي.
د یونسکو په راپور کې راغلي، د ماشومانو یو پر شمېږمې برخې څخه ډېر یې په جګړه ځپلو سیمو کې ژوند کوي، چې د رسمي شمېرونو سربېره یې په میلیونونو نور ماشومان له زده کړې بې برخې کړي دي.
یونسکو ویلي، دا وضعیت په ځانګړې توګه په منځنۍ آسیا کې د اندېښنې وړ دی، هغه ځای، چې سیمه ییزې شخړې تل د دېر ښوونځیو د تړل کېدو لامل شوې او میلیونونه ماشومان یې له درسي ټولګیو لرې ساتلي او د لا شا ته پاته کېدو له خطر سره مخ دي.
د ملګرو ملتونو دې سازمان ویلي، په ټوله نړۍ کې په اوسط ډول په ابتدايي او ثانوي زده کړو کې د جنسیت تشه د پام وړ کمه شوې ده.
یونسکو په ټوله نړۍ کې د ماشومانو د ملاتړ ژمنتیا ښودلې وايي، د نړیوالو ننګونو سره سره، زده کړې لا هم ورته لومړیتوب لري.
دا بنسټ په داسې حال کې له زده کړو پاتې ماشومانو په اړه خپل راپور خپروي، چې پنځه کاله کېږي، د طالبانو د محدودیتونو له امله افغان نجونې له ښوونځیو محرومې دي.
