هرات ښار کې سیمه ییزه سرچینې وايي، طالبانو دوه تنه مدني فعالان، هېواد کې د نجونو د ښوونځیو په تړلو، د نیوکې کولو له امله نیولي دي.
رخشانه: هرات کې لږ تر لږه درې سرچینو رخشانې رسنۍ ته ویلي، دغه دوه مدني فعالان نن سهار (شنبې د وري ۸ مه) د هرات ښار څخه نیول شوي دي.
دغه دوه تنه مدني فعالان قدوس خطیبي او فیاض غوري نومېږي او هغوی د فسبوکي پوسټونو او په هېواد کې د نجونو پر مخ د ښوونځیو په تړل کېدو د نیوکې کولو له امله نیول شوي دي.
د پوهنتون استاد او مدني فعال قدوس خطیبي په خپله فسبوک پاڼه د یوه انځوریز کلپ په خپرولو سره لیکلي: «د ټولو غوښتنه! د ښوونځیو او پوهنتونونو دروازې د افغان نجونو پر مخ خلاصې کړۍ.»
هغه په دې انځوریز کلپ کې وايي: «د نجونو پر مخ د ښوونځیو او پوهنتونو د دروازو تړل کېدو څخه پنځه کاله تېرېږي، خو د اسلامي امارت چارواکي، داسې نه ښکاري، چې د نجونو پر مخ دې د ښوونځیو او پوهنتونو دروازې پرانیزي.»
دې مدني فعال له طالبانو د نجونو پر مخ د ښوونځیو او پوهنتونو د دروازو پرانستو غوښتنه کړې ده.
مدني فعال فیاض غوري هم دوه ورځې وړاندې په خپله فسبوک پاڼه لیکلي وو «د دې خاورې د نجونو پر مخ د پوهې د دروازو پرانستو په هیله.»
تر اوسه د دې دوه هراتي مدني فعالانو د خوشي کېدو په اړه معلومات نشته. هرات کې سیمه ییز طالب چارواکو هم تر اوسه په دې اړه څه نه دي ویلي.
طالبانو په تېرو کابو پنځو کلونو کې په وار وار مدني او د ټولینزو رسنیو فعالان، پر دې ډلې د نیوکو کولو له آمله نیولي او ځینې وخت یې هغوی زنداني کړي هم دي.
په هېواد کې د ښځو او نجونو په وړاندې د طالبانو د محدودیتونو، د شاوخوا پنځو کلونو په تېرېدو سره، له دې محدودیتونو هېڅ یو، په ځانګړې توګه د زده کړې محدودیت، د دې ډلې له خوا نه دی لغوه شوی.
