د «افغان ښځو د آزادۍ او پراختیا سازمان» اعلان وکړ، چې هېواد کې د نوي ښوونیز کال له پیل سره سم یې، له زده کړو پاتې نجونو لپاره د انلاین ښوونځي رسمي پیل وکړ.
رخشانه: دافغان ښځو د آزادۍ او پراختیا سازمان اړوند انلاین ښوونځي، پنشنبې د (وري ۶ مه) افغانستان، ایران او پاکستان کې له زده کړو پاتې لږ تر لږه ۴۰ نجونو ته په رسمي ډول فعالیت پیل کړی دی.
د افغان ښځو د آزادۍ او پراختیا سازمان ویلي، دا پروګرام له ډېجیټلي پروګرامونو په ګټې اخیستنې او د زده کړې فرصتونو برابرولو، پیاوړتیا او رواني ملاتړ چمتو کولو په موخه د نجونو لپاره تر سره کېږي.
د دې انلاین ښوونځي مسوولینو د محرومیت مقابلې او فردي پراختیا د وسایلو په توګه د زده کړې پر اهمیت ټینګار کړی او د نجونو د زده کړو څخه د کورنیو ملاتړ یې خورا مهم بللی دی.
د افغان ښځو د آزادۍ او پراختیا بنسټ ویلي، د دې انلاین ښوونځي پروسه د افغانستان له ښوونیز نصاب او د نړیوالو معیارانو په پام کې نیولو سره سمه ده.
په افغانستان کې له زده کړو د نجونو محرومیت پنځم کال ته ننوځي او مدني بنسټونه هڅه کوي، چې د آنلاین او ځای ناستو ښوونځیو په جوړو، د هغوی لپاره زده کړو ته د لاسرسي زمینه برابره کړي.
طالبانو د پشنبنې په ورځ د پنځم پرلپسې کال لپاره، په هېواد کې نوی ښوونیز کال، له شپږم ټولګي بره نجونو پر مخ د ښوونځیو دروازو له پرانستو پرته پیل کړ.
د ۲۰۲۱ په اګست کې پر افغانستان د طالبانو له بیا واکمنېدو وروسته، له شپږم ټولګي بره نجونې تر «امرثاني» پورې ښوونځیو ته له تګه راوګرځول شوې.
دغه راز دې ډلې په دولتي او خصوصي پوهنتونو او طبي انستېتیوتونو کې هم د افغان ښځو او نجونو په زده کړه بندیز لګولی دی.
طالبانو په تېرو کابو پنځو کلونو کې د نجونو په وړاندې د زده کړې د محدودیت لغوه کولو، په اړه د نړیوالې ټولنې، بشري حقونو د بنسټونو او هېوادوالو غوښتنه له پامه غورځولې ده.
دا ډله تر اوسه نه ده چمتو شوې، چې د ښځو او نجونو د حقونو او اساسي خپلواکیو، له هغې جملې د زده کړې او تحصیل محدودیتونه لغوه کړي.
ملګرو ملتونو څه موده وړاندې په یوه راپور کې لیکلي، د طالبانو له لوري له شپږم ټولګي بره نجونو زده کړې ته نه پرېښودو له آمله، ۲.۲ میلیونه افغان نجونې له زده کړو محرومې شوې دي.
