د افغانستان د چارو لپاره د برېتانیا استازي ریچارد لیندسي ویلي، د طالبانو تر واک لاندې افغانستان کې د بشري حقونو وضعیت ټکان ورکوونکی دی.
رخشانه: لیندسي نن (سه شنبه د وري ۱۱ مه) په خپله اېکس پاڼه د یوه پوسټ په خپرولو سره لیکلي، هېڅ هېواد سوکالۍ ته نه رسېږي، په داسې حال کې چې نیمايي وګړي یې له زده کړې، کار او ژونده محروم دي.
هغه لیکلي، د افغانستان هر وګړۍ د دې وړ دی، چې له ځورولو او څار پرته په خپلواکه توګه ژوند وکړي.
د افغانستان د چارو لپاره د ملګرو ملتونو استازي، هېواد کې د طالبانو محدودیتونو ته په اشارې له دې ډلې غوښتي، چې د وګړو حقونو ته درناوی وکړي.
طالبان په تېرو کابو پنځو کلونو کې د افغان ښځو او نجونو په وړاندې د محدودیتونو په لګولو، د مخکني حکومت د کارکوونکو، نظامیانو، خبریالانو، رسنیزو او مدني فعالانو، ښځینه معترضینو په نیولو، ربړونې، وژلو سره، د بشري حقونو څخه په سرغړونو تورن شوي دي.
ملګرو ملتونو نن سهار اعلان وکړ، چې افغانستان کې د بشري حقونو بحران دوام لري او همدا ډول ښځې او نجونې د طالبانو د محدودیتونو له امله، د عمومي ژوند څخه ایستل کېږي.
د ملګرو ملتونو د بشري حقونو کمېشنر ولکر تورک ویلي دي: «طالبانو عملآ په عامه ژوند کې د ښځو او نجونو شتون جرم ګرځولی. د ښځو له شتون پرته هېواد پرمختګ نه شي کولی.»
د ملګرو ملتونو د راپور له مخې، طالبانو د ۲۰۲۱ کال له اګست وروسته، په افغانستان کې لږ تر لږه ۱۲ تنه د خلکو په وړاندې اعدام کړي او په اونیزه توګه بدني سزاوې په عام محضر کې پلې کوي.
