ننګرهار کې سیمه ییز طالب چارواکي وايي، د دې ولایت حصارک ولسوالۍ کې د پلار او زوی تر منځ جګړه کې، یوه ځوانه نجلۍ وژل شوې ده.
رخشانه: ننګرهار کې د طالبانو د اطلاعاتو او کتلور ریاست د اطلاعاتو امر قریشي بدلون ویلي، دا پېښه پرون (جمعه د وري ۱۴ مه) د حصارک ولسوالۍ د «جومات» په کلي کې رامنځ ته شوې ده.
د بدلون په وینا، دا پېښه هغه مهال رامنځ ته شوې، چې پلار د کورني تاوتریخوالي له آمله، په خپل زوی د کلاشنکوف ډزې کړې، چې په ترڅ کې یې ځوانه لور وژل شوې ده.
هغه زیاته کړې، دې ځوانې نجلۍ غوښتل، د پلار او ورور تر منځ د جګړې مخنوی وکړي.
ننګرهار کې د طالبانو د اطلاعاتو او کلتور ریاست د اطلاعاتو امر وايي، د دې پېښې د روښانولو لپاره څېړنې روانې دي.
په ورته وخت د سیمې دوو تنو اوسېدونکو د دې پېښې د پخلي تر څنګ رخشانې رسنۍ ته ویلي، دا ځوانه نجلۍ شاوخوا ۱۷ کلنه وه.
د هغوی په وینا، دې ځوانې نجلۍ د پلار او ورور تر منځ جګړه کې ژوند له لاسه ورکړی دی.
له دې وړاندې هم د هېواد په یو شمېر ولایتونو کې ورته پېښې رامنځ ته شوې دي. د دې ډول ډېری پېښو د رامنځ ته کېدو لامل کورنی تاوتریخوالی بلل شوی دی.
د طالبانو له بیا واک ته رسېدو راوروسته ځنځیري او مرموزې وژنې، ، د ښځو او نجونو ځان وژنې او د کورنیو د غړو له خوا د هغوي وژل په بې مخینې توګه زیات شوي دي.
