د طالبانو د پېښو سره د مبارزې ملي ادارې اعلان کړی، چې په تېرو ۲۴ ساعتونو کې د هېواد په ۲۰ ولایتونو کې، د بارانونو او سېلابونو راوتلو له امله، ۱۵ تنو ژوند له لاسه ورکړی، ۱۸ تنه ټپیان او یو تن ورک شوی دی.
رخشانه: د دې ادارې ویاند یوسف عماد نن (چهارشنبې د وري ۱۹ مه) په یوه ویډیو کې ویلي، په تېرو ۲۴ ساعتونو کې د استوګنې ۱۳۹ کورونه په بشپړه توګه ویجاړ شوي او ۶۵۷ نور کورونه زیانمن شوي دي.
د عماد په وینا، په راتلونکو وروځو کې هم د هېواد په ټولو ولایتونو کې د بارانونو او سېلابونو اټکل شوی دی.
همدارنګه نوموړي ویلي، د روان کال د وري میاشتې له شپږمې تر اوسه، د طبیعي پېښو له امله په ټول هېواد کې ۱۴۸ تنو ژوند له لاسه ورکړی، ۲۱۶ تنه ټپیان او ۸ تنه ورک شوي دي.
د طالبانو د پېښو سره د مبارزې ادارې ویاند وايي، په دې موده کې لسګونه کورنه په شپړه او قسمي توګه ویجاړ شوي او سلګونه هکتاره ځمکه هم تخریب شوې ده.
په ورته وخت ننګرهار کې سیمه ییز طالب چارواکو ویلي، تېرې دوه ورځې په دغه ولایت کې د سختو بارانونو او سېلابونو راوتلو له امله د ښځو او ماشومانو په ګډون ۲۴ تنو ژوند بایللی او ۳۳ تنه نور ټپیان شوي دي.
ننګرهار کې د طالبانو د اطلاعاتو او کلتور ریاست د اطلاعاتو امر قریشي بدلون وايي، د دې ولایت شېرزاد ولسوالۍ کې د یوه کور د چت لوېدو پېښه کې د ښځو او ماشومانو په ګډون د یوې کورنۍ اوو غړو ژوند بایللی دی.
بدلون زیاته کړې، دا پېښه سه شنبې (د وري ۱۸ مه) سهار وختي د شېرزاد ولسوالۍ د «کمي ترمي» په سیمه کې رامنځ ته شوې ده.
هغه زیاته کړې د دې پېښې په ترڅ کې د یوې کورنۍ اوو غړو ژوند بایللی، چې پنځه ه کې ماشومان، یوه ښځه او یو تی خوری ماشوم وو.
د بدلون په وینا، د دې کور چت د باران له امله رالوېدلی دی.
ننګرهار کې د طبیعي پېښو سره د طالبانو د مبارزې ریاست مرستیال ادریس ساپي ویلي، د دې ولایت مرکز جلال آباد ښار کې د یوه کور د چت لوېدو پښه کې د ښځو او ماشومانو په ګډون پنځو تنو ژوند بایللی او دوه نور ټپیان شوي دي.
د هغه په وینا، دا پېښه د جلال آباد ښار انګورباغ څلورلاري ته نېږدې د «جرغاره» په سیمه کې رامنځ ته شوې ده.
همدارنګه ساپي زیاته کړې، د ننګرهار، دره نور، پچیراګام، هسکه مېنه او بهسودو ولسوالیو کې د بارانونو او سېلابونو راوتلو له امله د ښځو او ماشومانو په ګډون شپږ تنو ژوند له لاسه ورکړی او ۲۰ تنه نور ټپیان شوي دي.
