افغانستان کې د روغتیا نړیوال سازمان (WHO) اعلان کړی، چې د دې هېواد ډېری لرې پرتو سیمو کې «له زېږون مخکې روغتیايي پاملرنې او خوندي زېږون» ته د ښځو لاسرسی محدود دی.
رخشانه: دې بنسټ نن (پنشنبې د وري ۲۰ مه) د یوه راپور په خپرولو سره ویلي، روغتیايي خدماتو ته په لاسرسي کې ځنډ کولی شي د [ښځو] د ژوند لپاره ګواښ وي.
د روغتیا نړیوال سازمان لیکلي «له تخصصي پاملرنې پرته، میندې عوارضي خطر لکه شدیدې خونرېزۍ، انتان او په ځنډ زېږون له ګواښ سره مخ کېږي.»
د دې بنسټ په وینا، روغتیايي خدماتو ته نه لاسرسی «کېدای شي نوزېږدو ماشومان ته تنفسي ستونزې پیدا کړي او مهم لومړني حیاتي مداخلات له لاسه ورکړي.»
د روغتیا نړیوال سازمان ټينګار کړی، چې «ساده روغتیايي خدمات کولی شي د زیانونو رامنځ ته کېدو مخنیوی وکړي او ژوندونه وژغوي، په ځانګړې توګه له زېږون وروسته لومړیو ورځو کې.»
افغانستان کې د روغتیا نړیوال سازمان استازي ډاکتر اډوین د مور او ماشوم پالنې ته په لاسرسي ټينګار کړی دي.
هغه ویلي: «د میندو او نوزېږدو ماشومانو لپاره روغتیايي خدماتو ته په وخت او باکیفیته لاسرسي ډاډمنول، د ژوند ژغورلو لپاره خورا مهم دي.»
د روغتیا نړیوال سازمان همدارنګه له اړمنو ټولنو د ملاتړ ژمنه کړې وايي، له میندو او ماشومانو ملاتړ ته دوام ورکوي تر څو «هره مور او نوزېږدی وتوانېږي، د خپلې اړتیا وړ پاملرنه خپل کور ته نېږدې پیدا کړي.»
