افغانستان کې د ملګرو ملتونو د ماشومانو ملاتړي صندوق (یونیسف) ویلي، تر پنځو کلونو کمر عمره ۱۵.۳ میلیونه افغان ماشومان له خوارځواکۍ رنځېږي.
رخشانه: یونیسف نن (سه شنبې د وري ۲۵ مه) په یوه راپور کې لیکلي، په ۲۰۲۶ کال کې لا هم نړۍ کې یو له تر ټولو ستر بشري بحرانونو پر ځای پاتې دی.
د دې بنسټ د راپور له مخې، اټکل کېږي په ۲۰۲۶ کال کې به شاوخوا ۱۹.۹ میلیونه وګړي، چې د ټول نفوس ۴۵ سلنه کېږي، بشري مرستو ته اړتیا ولري.
یونیسف لیکلي، افغان ښځې او نجونې زده کړې او روغتیايي خدماتو ته د لاسرسي برخه کې له سختو محدودیتونو سره مخ دي.
د ملګرو ملتونو د ماشومانو د ملاتړي صندوق راپور کې راغلي، افغانستان کې له پنځه کلنۍ کم عمره ۱۵.۳ میلیونه ماشومان له خوارځواکۍ رنځېږي.
یونیسف ویلي، کلونه جګړو، اقتصادي ماتېدنې، په اساسي خدماتو کې نه پانګونې او له بشري حقونو سرغړونو، افغانستان د پاشل کېدو په درشل درولی دی.
د دې بنسټ د راپور پر اساس، افغانستان کې نا برابره آب و هوا، پرلپسې وچکالۍ او ناڅاپي سېلابونو، پر کرنیزو تولیداتو اغېز کړی، د خوړو نه خوندیتوب یې زیات کړی او دا شرایط په ماشومانو کې د مړینې د زیاتوالي، ناروغیو او ودې د ګډوډیو لامل شوي دي.
یونیسف اشاره کړې، چې افغانستان کې بېوزلي لا هم پراخه ده، د دې هېواد کابو ۶۵ سلنه وګړي تر بېوزلۍ لاندې کرښه کې ژوند کوي او نېږدې له هرو دریو تنو یو نفر له سختو څو اړخیزه محدودیتونو سره مخ دی.
دې بنسټ د طالبانو او پاکستان تر منځ جګړو ته اشاره کړې وايي، دا جګړې د ملکي وګړو د مرګ ژوبلې، د بنسټیزو ودانیو د ویجاړېدو او زرګونه کورنیو د بې ځایه کېدو سبب شوې.
یونیسف ویلي، په جګړیزه سیمو کې له اوسېدونکو ۱۶.۴ میلیونه وګړو، له یو میلیون زیات کسان بېړنیو خوراکي خدماتو ته اړتیا لري. ځینې روغتیايي مرکزونه د ناامنۍ یا د سرچینو د کمښت له امله تړل شوي دي.
دې بنسټ اټکل کړی، چې د طالبانو او پاکستان تر منځ جګړو څخه، د شپږو ولایتونو له زیانمن شویو کسانو، ۱۵۸۸ تر پنځو کلونو کم عمره ماشومان او ۶۷۷۷ امیدوراه او شیدې ورکوونکې ښځې خوراکي ملاتړ ته اړتیا لري.
یونیسف ویلي، په کال ۲۰۲۶ کې اټکل کېږي، چې افغانستان کې به ۷.۱ میلیون ماشومان د زده کړې بېړنیو مرستو ته اړتیا ولري.
دې بنسټ زیاته کړې، د نجونو په زده کړې د طالبانو محدودیتونو د پام وړ اغېز درلود او هغوی یې د زده کړې له فرستونو محرومې کړې دي.
