افغانستان کې د ملګرو ملتونو د استازولۍ دفتر (UN) وايي، د افغان نجونو په زده کړو د طالبانو د بندیز دوام، د کم عمره ودونو خطرونه زیاتوي.
رخشانه: ملګرو ملتونو نن (چهارشنبې د وري ۲۶ مه) په خپل کلني راپور کې لیکلي، د افغان نجونو په زده کړو د طالبانو محدودیت، په ۲۰۲۵ کال کې، د بشري پانګې د عادلانه پراختیا په وړاندې لا هم تر ټولو لوی خنډ پاتې شو.
د ملګرو ملتونو په راپور کې راغلي، دا محدودیتونه جنسیتي درځونه لا پراخوي، د کم عمره ودونو خطرونه زیاتوي او د زده کړې په بدیلو لارو نور فشارونه ډېروي.
په دې راپور کې لیکل شوي، چې دوامداره جوړښتي فشارونه، له هغې جملې د راستنېدونکو، ښځو، ماشومانو او له ټکانونو زیانمنو ټولنو د لوړ زیان مننې ترمنځ په اړینو خدماتو او بشري همغږې پانګونې، د پایلو د نور کمښت د مخنیوي په اړتیا ټینګار کوي.
دا راپور وايي، روان میلادي کال افغانستان کې ۴۸۷ غیرنظامي وګړي د ماینونو او ناچاودو توکو قرباتي شوي دي.
ملګرو ملتونو ویلي، په ۲۰۲۵ میلادي کال کې ۳۴.۳ میلیون وګړو ته اساسي روغتیايي خدمات وړاندې شوي. په روغتیايي مرکزونو کې له ۹۵۸ زره او ۲۰۹ بریالیو زېږونونو ملاتړ شوی او ۳.۴۲ میلیونه ماشومانو درې ګونی واکسن (پنتا-۳) تر لاسه کړی دی.
افغانستان کې د روغتیا نړیوال سازمان استازي ډاکتر ادوین سنیزا سالوادور ویلي، په افغانستان کې باید ان تر ټولو لرې پرتې کورنۍ، ژغورونکو روغتیايي خدماتو ته لاسرسی پیدا کړي.
ملګري ملتونه پر دوام وايي، د بودیجې د یوې لویې برخې د کمښت له آمله، د ملګرو ملتونو د خوړو نړیوال پروګرام اړ شوي، چې په خوراکي مرستو کې، تر ټولو د زیانمنو کسانو یوازې یوې وړې برخې ته لومړیتوب ورکړي.
یاد سازمان لیکي، په ۲۰۲۵ کال کې په ټولیزه توګه ۴ میلیونه، ۶۱۱ زره او ۷۸۶ افغان ماشومان، د دې بنسټ په ملاتړ دولتي زده کړو ته لاسرسی موندلی دی.
د ملګرو ملتونو د راپور بر بنسټ، په ۲۰۲۵ کال کې په افغانستان کې ۱۵ زره او ۶۱۰ ځوانانو او لویانو د سواد زده کړې په اساسي کورسونو کې نوم لیکنه کړې، چې له دې ډلې ۱۲ زره او ۶۸۰ تنه ښځې او ۲ زره او ۹۳۰ هغه یې نارینه وو.
راپور راوړي، چې د تېر میلادي کال په اوږدو کې، په افغانستان کې له لویانو ۵۵۹ زره او ۶۴۰ کسانو د زده کړې او مهارتونو د روزنې پروګرامونه بشپړ کړي، چې په کې ۳۵۶ زره او ۲۱۶ ښخې او ۲۰۳زره او ۴۲۴ هغه یې نارینه وو.
