د وکیلانو نړیوال مرکز د بشري حقونو موسسه(IBAHRI) د طالبانو د محکمو جزايي اصول نامې ته په غبرګون کې وايي، دا قانون تر ډېره په بنسټیزه توګه د ښخو تر لاس لاندې کولو، د هغوی په وړاندې د تاوتریخوالي عادي کولو او د عصري غلامۍ په قانوني کولو تمامېږي.
رخشانه: دې بنسټ نن (سه شنبې د غوايي اوله) د یوې اعلامیې په خپرولو سره «نړۍ کې د ښخو او نجونو د حقونو نړیوال شا تګ» په اړه خبرداری ورکړی دی.
د IBAHRI بنسټ په اعلامیه کې راغلي، د طالبانو د محکمو جزايي اصول نامې، د افغان ښځو پر حقونو پراخ او تل پاتې محدودیتونه لا زیات کړي دي.
اعلامیې زیاته کړې، د دې قانون د توشېح سره سم، د افغان ښځو او نجونو سره د نړیوالو مرستو ملاتړي پروګرامونه هم کم شوي او دا کار د شته بحران په لا زیاتېدو تمام شوی دی.
د وکیلانو نړیوال مرکز د بشري حقونو موسسې ویلي، د دې ننګونې سره د مقابلې لپاره یې خپل نړیوال کاري پروګرامونه ګړندي کړي او روان میلادي کال به د ښځو او نجونو د حقونو روښانه کولو لپاره د لوړې کچې غوندې جوړې کړي.
د یادې موسسې په وینا، دې غونډو کې به د جرمونو مستند کولو، عدالت او حساب ورکولو ته د لارې موندلو، د قربانیانو او ژوندي پاتې شویو کسانو د ملاتړ په څېر مهمو مسلو باندې به خبرې وشي.
دې بنسټ ژمنه کړې، چې شخړو پورې اړوند جنسي تاوتریخوالي مستند کولو لپاره، د نړیوالو معیارونو«په شخړو کې د جنسي تاوتریخوالي د مستند کولو او څېړنې نړیوال پروتوکول» سره سم به روزنیز پروګرامونه جوړ کړي.
