د ننګرهار ولایت مرکز جلال آباد کې یو شمېر ښځې، د دې ښار په دولتي روغتونو کې د اکسرې (راډیولوژۍ) خدماتو له نشتوالي شکایت کوي.
رخشانه: جلال آباد ښار کې لږ تر لږه درې مېرمنو رخشانې رسنۍ ته ویلي، په دې وروستیو کې په دولتي روغتونو کې د اکسرې خدمات محدود شوي دي.
روغتیاپالانو دغو ښخو ته، چې په دې وروستیو کې یې د درملنې په موخه دولتي روغتونو ته ورغلې ویلي، په دولتي روغتونونو کې د اکسرې خدمات شتون نه لري او باید هغه په خصوصي مرکزونو کې تر سره کړي.
د جلال آباد حوزي روغتون، د پوهنتون روغتون او دولتي روغتون، له هغو مرکزونو دي، چې هر ورځ په بېلا بېلو ناروغیو اخته، زرګونه ښځې، ماشومان او لویان ورځي.
د ناروغانو منځ کې هغه کسان چې د هډکو او اعصابو د جراحۍ له ستونزو سره مخ دي، د ښه تشخیص لپاره د اکسرې تر سره کولو سپارښته ورته کېږي.
د ننګرهار د حصارک ولسوالۍ اوسېدونکې ۴۰ کلنه فرېبا چې د ملا درد ستونزه لري وايي، حصارک ولسوالۍ کې ډاکترانو ورته ویلي، چې د ستونزې د تشخیص لپاره باید اکسرې وکړي او د جلال آباد ښار حوزوي روغتون ته ورشي.
هغه زیاتوي، د ډاکترانو له سپارښتنې سره سم یې د ننګرهار حوزي روغتون ته مراجعه وکړه، خو هلته ډاکترانو ورته ویلي، اکسرې خدمات نشته او باید په خصوصي مرکزنو کې یې تر سره کړي.
د ننګرهار ولایت د بټي کوټ ولسوالۍ دوه ۳۰ کلنې ښځې نسرین او اسلام بي بي، چې دواړه د پښو په رنځ اخته دي، وايي، د درملنې لپاره یې د فاطمه الزهرا روغتون ته مراجعه کړې ده.
د دغو دوه ناروغانو په وینا، ډاکترانو د اکسرې کولو سپارښتنه ورته کړې او ویلي یې دي، چې هغه باید په خصوصي مرکزونو کې تر سره کړي.
هغوی زیاته کړې، د اقتصادي ستونزو له امله دولتي روغتونو ته ورځي، خو په دې روغتونو کې خدمات مناسب نه دي.
دې ښځو ویلي، له یوه لوري بېکاري او بېوزلي او له بل لوري په دولتي روغتونونو کې نامناسبه خدمات، دوی له جدي ستونزو سره مخ کړې دي.
په ورته وخت، ننګرهار کې د طالبانو د عامې روغتیا یو له چارواکو، چې نه غوښتل نوم یې واخستل شي، د دې موضوع په تایید سره رخشانې رسنۍ ته ویلي، په دې وروستیو ورځو کې د اکسرې فلمونو په تمامېدو سره، د ښار او ولسوالیو په روغتونونو کې دا ستونزه رامنځ ته شوې ده.
هغه زیاته کړه، هڅه کوې تر څو دا خدمات بېرته د خلکو لپاره برابر کاندي.
