کاناډا کې مېشت د «نوي نسل د بدلون شبکې او پاکستان کې «جنبش آزادګان در تبعید» د طالبانو تر واک لاندې افغانستان کې، د ښځو د وضعیت په اړه د حق غوښتنې پروګرام جوړ کړی دی.
رخشانه: دغه پروګرام نن (چهارشنبې د غوايي ۲ مه) د مدني بنسټونو، بشري حقونو د فعالانو، یو شمېر څېرو او جلا وطنه افغان سیاسیونو د استارو په ګډون جوړ شو.
د دې ناستې ګډونوالو ویل، سره له دې چې له افغانستانه کډه شوي، خو د ګډوالۍ په ټولو پړاونو کې غلي نه دي پاتې شوي، او تل یې د افغان ښځو او نجونو د غلې کړای شوي غږ د پورته کولو هڅه کړې ده.
د هېواد د پارلمان مخکنۍ غړې شکریې بارکزۍ په دې ناسته کې ویلي، نن ورځ ښځې د بل هر وخت په پرتله، د ځان بساینې، وړتیا، زده کړې او ګډون په مفهوم پوهېږي.
هغې هېواد کې د ننه او بهر کې مېشتو افغان ښځو او نجونو ته په خطاب کې زیاته کړه، چې په زړورتیا سره ودرېږي او باور ولري، چې له دوی هره یوه، د بدلون راوستو له ریښتینو مشرانو څخه دي.
د دې ناستې ګډونوالو هېواد کې د ښځو او نجونو په وړاندې د طالبانو پراخو محدودیتونو ته په اشارې، د پیوستون، د حق غوښتنې د دوام او د ښځو د اساسي حقونو د بېرته تر لاسه کولو لپاره د ګډو هڅو پر اړتیا ټینګار وکړ.
دوی د افغان ښځو او نجونو په وړاندې د محدودیتونو له زیاتېدو اندېښنه وښوده او هېواد کې د ننه ښځو د وضعیت په اړه یې د نړیوالنې د جدي ملاتړ او پاملرنې غوښتنه وکړه.
طالبانو په تېرو کابو پنځو کلونو کې د پراخو محدودیتونو په لګولو سره، د هېواد ښځې او نجونې له خپلو لومړنیو حقونو بې برخې کړې دي.
دې ډلې په یاده موده کې پر ښځو د لګول شویو محدودیتونو لغوه کولو ته هېڅ پاملرنه نه ده، بلکې لا یې زیات کړي دي.
