طالبانو د روانې اوونۍ اوږدو کې، په بلخ، فراه، جوزجان، میدان وردګ، بادغیس، پکتیا او بدخشان کې د درې ښځو په ګډون ۴۹ تنه د بېلا بېلو جرمونو په تور په دورو وهلي دي.
رخشانه: دا کسان د شرابو د تولید، څښلو، پېر او پلور، روژې خوړلو، د مور او پلار ځورولو، له واده بهر جنسي اړیکې او غلا په تور په دې اوو ولایتونو کې په دورو وهلي دي.
شنبې د (وري ۲۹ مه) جوزجان، فراه او بلخ کې د دوه ښځو په ګډون ۴۲ تنه په دورو وهلي دي.
د دوه ښځو په ګډون ۲۷ تنه د شرابو د تولید، څښلو، پېر او پلور، روژې خوړلو، د مور او پلار ځورولو او له واده بهر جنسي اړیکې په تور، د جوزجان ولایت مرکز جوزجان ښار کې له ۲۰ تر ۳۹ دورو وهلي دي.
معلومه نه ده، چې دې کسانو ته د څومره بند سزا ورکړل شوې ده.
۱۴ تنه د لواطت په تور د فراه ولایت بالابلوک ولسوالۍ کې د خلکو په وړاندې له ۲۰ تر ۳۰ دورو وهل شوي دي.
دا معلومه نه ده، چې دا کسان په څومره بند محکوم شوي دي.
یو تن له واده بهر جنسي اړیکې په تور د بلخ ولایت بلخ ولسوالۍ کې د خلکو په وړاندې ۳۹ دورې وهل شوی او په دوه کاله تنفذي بند هم محکوم شوی دی.
یکشنبې د (وري ۳۰ مه) دوه تنه د غلا په تور د میدان وردګ ولایت چک ولسوالۍ کې د خلکو په وړاندې ۳۹ دورې وهل شوي او په دوه کاله تفنذي بند محکوم شوي دي.
دوشنبې د (وري ۳۱ مه) درې تنه د بېلا بېلو تورونو له امله بادغیس او پکتیا ولایتونو کې د خلکو په وړاندې په دورو وهل شوي دي.
دوه تنه د روژې خوړلو په تور د بادغیس ولایت دره بوم ولسوالۍ کې د خلکو په وړاندې ۲۰ دورې وهل شوي او په دوه میاشتې تنفذي بند هم محکوم شوي دي.
یو تن د وژنې د ګواښ په تور د پکتیا ولایت زرمت ولسوالۍ کې د خلکو په وړاندې ۱۰ دورې وهل شوی او په درې کاله تنفذي بند محکوم شوی دی.
چهارشنبې د (غوايي ۲ مه) د یوې ښځې په ګډون دوه تنه له واده بهر جنسي اړیکې په تور د بدخشان ولایت خاش ولسوالۍ کې د خلکو په وړاندې ۳۰ دورې وهل شوي او په یوه کال تنفذي بند محکوم شوي دي.
سره له دې، چې د بشري حقونو بنسټونو په عام محضر کې د خلکو په دورو وهل غندلي او هغ یې د انساني کرامت څخه سرغړونه بللې، خو طالبانو په تېرو شاوخوا پنځو کلونو کې د ښځو او ځوانانو په ګډون سلګونه تنه د بېلا بېلو تورونو له امله، د هېواد په ګوټ ګوټ کې د خلکو په وړاندې په دورو وهلي دي.
دې ډلې د نړیوالې ټولنې او بشري حقونو د بنسټونو غوښتنې ته په نه پاملرنې، لږ تر لږه ۱۴ تنه د زرګونو نندارچیانو په ځانګړې توګه د ماشومانو په شتون کې اعدام کړي دي.
