د بشري حقونو څار ډلې د افغانستان د برخې څېړونکې فرشته عباسي وايي، طالبان په داخلي رسنیو د فشار راوړلو سره هڅه کوي، د جلا وطنه افغان ښځو غږ کابو او غلی کړي.
رخشانه: عباسي نن (شنبې د غوايي ۵ مه) په خپله اېکس پاڼه د یوه پوسټ په خپرولو سره لیکي: «د طالبانو ځپوونکی نظام تر افغان پولو نه محدودېږي.»
نوموړې زیاته کړې، په دې وروستیو کې یوې سیمه ییزې افغان رسنۍ له دې غوښتي، چې پر ځای یې یو نارینه همکار، د بشري حقونو څارډلې د وروستي راپور په اړه یو ویډیويي کلېپ کې خبرې وکړي.
عباسي دا غوښتنه ټکان ورکوونکې بللې لیکي: «په غوسه مې پیام بیا ولوست، سره له دې، چې زه د بشري حقونو څار ډله کې د افغانستان د برخې راپور لیکوونکې او څېړونکې وم، دې رسنۍ غوښتل، چې زما پر ځای مې یو نارینه همکار خبرې وکړي. په خواشینۍ سره د دې غوښتنې تر شا هغه څه دي، چې ډېری افغان مېرمنې د نړۍ په ګوټ ګوټ کې هغه تجربه کوي.»
د افغانستان د څانګې څېړونکې زیاتوي، طالبانو دې رسنۍ ته امر کړی، هر هغه افغان ښځه، پرته له دې چې په هر ځای کې ژوند کوي، د رسنیو سره د خبرو پر مهال باید بشپړ حجاب سره راڅرګنده شي.
هغې د ښځو او نجونو په وړاندې د طالبانو پراخو محدودیتونو ته په اشارې ویلي، په افغانستان کې د بیان آزادۍ په ماناداره توګه په ځانګړي ډول د ښځو لپاره شتون نه لري.
عباسي په هېواد کې د ننه په رسنیو کې د ښځو کار ته اشاره وکړه وايي، په ځینو ولایتونو کې ښځینه خبریالانې د کار اجازه نه لري او د راډیو او تلوېزیون له لارې د هغوی غږ خپرېدل بند کړای شوي دي.
هغې د طالبانو نظام «ځپوونکی» وباله زیاته یې کړه، دا ډله هڅه کوي پر رسنیو د فشار راوړلو سره، د هغو کسانو غږ غلی کړي، چې د دوی د ناوړه ګټې اخیستنې په اړه خبرې کوي.
عباسي په ټينګار سره وايي، دا ډول اقدامات د افغان ښځو د بیان آزادۍ د حق لپاره ناوړه پایلې لري او هغوی نه باید دې ته اړ کړای شي، چې په عام ډکر کې د طالبانو تبعیض لرونکو قوانینو ته غاړه کېږدي.
