بادغیس کې د طالبانو والي د رسنیو دفتر وايي، د دې ولایت مرکز قلعه نو ښار کې د یوه کور د چت لوېدو پېښه کې څلورو ماشومانو او یوې ښځې ژوند بایللی او دوه تنه نور ټپیان شوي دي.
رخشانه: دا پېښه د شنبې په شپه (د غوايي ۵مه) سهار مهال ۳:۳۰ بجې د بادغیس د مرکز قلعه نو ښار اړوند د باغکي په سیمه کې رامنځ ته شوې ده.
بادغیس کې د طالبانو والي د رسنیو دفتر په یوه خبرپاڼه کې لیکلي، د استوګنې د دوه کوټو چتونه ناڅاپي رالوېدلي دي.
خبرپاڼه کې راوړل شوي د دې پېښې په ترڅ کې د یوې کورنۍ څلورو ماشومو نجونو او یوې ښځې ژوند بایللی او دوه تنه نور یې ټپيان شوي دي.
د پېښې د ټپیانو روغتیايي حالت نازک ښودل شوی دی.
معلومه نه ده، چې د دې کور چتونه په څه دلیل رالوېدلي دي.
تېره اوونۍ هم د میدان وردګ ولایت جغتو ولسوالۍ کې د یوه کور د چت لوېدو پېښه کې دوه ښځو ژوند بایللی وو.
د هېواد په ډېری سیمو کې د استوګنې کورونه د معیاري نه جوړېدو او زړښت له امله، د باران او واورې په موسمونو کې ویجاړېږي.
