د بشري حقونو د څار سازمان وايي، د فوټبال نړیوال فدراسیون (فیفا) له لوري نړیوالو رسمي لوبو ته د جلا وطنه افغان ښځینه فوټبال لوبډلې ستنولو پرېکړه، د جنسیتي برابرۍ او بشري حقونو د خوندیتوب لپاره یو تاریخي فرصت دی.
رخشانه: دې بنسټ نن (چهارشنبې د غوايي ۹ مه) د یوې اعلامیې په خپرولو سره ویلي، د فیفا دا پرېکړه، د دې څرګندوی ده، چې «هېڅ حکومت باید له عمومي ژونده د ښځو د حذفولو توان ونه لري.»
د «سپورت او حقونو» د ائتلاف اجرائیوي مدیرې آندریا فلورنس ویلي دي: «د فیفا دا پرېکړه د دې ډاډ تر لاسه کولو لپاره چې د فدراسیون هر غړی د جنسیتي برابرۍ او بشري حقونو په وړاندې خپل مسوولیتونه عملي کوي، خورا مهمه ده.»
د بشري حقونو څار ډله کې د نړیوالو نوښتونو مدیرې مینکی وردن ویلي، فیفا بالاخره سم کار وکړ او هغه تشه یې وتړله، چې د طالبانو تبعیضي سیاستونو ته یې د نړۍ په کچه د پلي کېدو اجازه ورکوله.
هغې زیاته کړې، د فیفا دا ګام باید د نړیوالو سپورتي بنسټونو د غبرګون لپاره، چې لوبغاړي د جنسیت، قوم یا باورونو له آمله په منظم ډول حذفېږي، یوه بېلګه و اوسي.
د بښنې نړیوال سازمان د اقتصادي او ټولنیز عدالت د څانګې مشر استیو کاکبرن ویلي «افغان ښځې دوه ځلې سزا لیدلې: یو ځل چې طالبانو له خپلو کورونو وشړلې او بل ځل د سپورت د نړیوالو بنسټونو له لوري، چې اجازه یې ورکړه هغوی له پامه وغورځول شي.»
هغه ټینګار کړی، چې «د ښځو د فوټبال لوبډلې په رسمیت پېژندنه د ټولو افغان مېرمنو لپاره د عدالت په لور یو ګام او د دې نښه ده، چې کله نړیواله ټولنه خپلې سترګې پټول نه ویني، نو څه شیان امکان پیدا کوي.»
فیفا نن سهار اعلان وکړ، چې د جلا وطنه افغان ښځینه فوټبال لوبډله، د طالبانو د تایید له اړتیا پرته کولی شي د فوټبال په رسمي سیالیو کې استازولي وکړي.
د فوټبال د نړیوال فدراسیون مشر جیاني اینفانتینو ویلي دي، دا پرېکړه په ټولنه نړۍ کې د سپورت په برخه کې یو پیاوړی او بې مخینې ګام دی.»
ټاکل شوې د Afghan women united لوبډلې راتلونکی رونیز کمپ د روان کال د جون میاشتې له لومړنۍ نېټې تر نهمې پورې په نیوزیلنډ کې تر سره شي.
طالبانو واک ته له بیا راتګ وروسته، د ښځو او نجونو په وړاندې د نورو محدودیتونو تر څنګ، د ښځو لوبې هم بندې کړې.
د دې محدودیت له لګولو وروسته، د افغانستان د ښځینه فوټبال ملي لوبډلې غړو هېواد پرېښود او په استرالیا، برېتانیا، آلبانیا، پرتګال او امریکا کې یې پناه واخیسته.
