د افغانستان د چارو لپاره د برېتانیا ځانګړي استازي ریچارد لیندسي د ښځو او نجونو په وړاندې د طالبانو پر محدودیتونو اندېښنه ښودلې وايي، «افغانستان سوکالۍ ته نه شي رسېدای، په داسې حال کې، چې نیم وګړي یې له زده کړو، کار او ټولنه کې له بشپړ ګدون څخه بې برخې دي.»
رخشانه: لیندسي نن (پنشنبې د غوايي ۱۰ مه) کابل ته د خپل سفر په پای کې په یوه اعلامیه کې لیکلي، چې ده په دې سفر کې له طالب چارواکو او مدني ټولنې له استازو سره لیدنې او خبرې اترې درلودې.
د افغانستان د چارو لپاره د برېتانیا ځانګړي استازي ویلي، په دې سفر کې یې د طالبانو او پاکستان تر منځ د شخړو، بشردوستانه لاسرسیو او بشري حقونو په اړه خبرې اترې کړې دي.
لیندسي د «ټولګډونه حکومتولۍ او د بشري حقونو برخه کې پرمختګ د نړیوالې تولنې سره د افغانستان د اړیکو د بنسټیزو ستنو په توګه» پر اهمیت ټینګار وکړ.
هغه همدارنګه د ملګرو ملتونو په مشرۍ د پروسې له لارې د رغنده ښکېلتیا پر اهمیت هم ټینګار وکړ او د بشري حقونو، ټول ګډونه حکومتولۍ او د ترهګرۍ سره د مبارزې لپاره د همکارۍ برخو کې یې د نړیوالو اندېشتو د حل لپاره د عملي اقداماتو غوښتنه وکړه.
دی وايي: «دا سفر خورا مهم فرصت وو تر څو په مستقیمه توګه د طالبانو له وزیرانو او چاروکو سره د هغه موضوعاتو په اړه خبرې اترې وکړي، چې د برېتانیا، نړیوالې ټولنې او د افغانستان د خلکو لپاره ارزښت لري.»
نوموړي زیاته کړې: «ما همدارنګه په دې سفر کې له کوم خنډ پرته بشري مرستو ته د لاسرسي پر اهمیت ټینګار وکړ، تر څو ژغورونکې مرستې د اړمنو کسانو لاس ته ورسېږي. همدارنګه برېتانیا د افغان وګړو ملاتړ ته ژمنه ده.»
ریچارد لیندسي ټینګار وکړ، چې د افغانستان د دوامداره راتلونکې لپاره د برېتانیا ملاتړ د داسې شرایطو رامنځ ته کولو پورې تړلی، چې ښځې په کې کار وکړي، ماشومان په کې زده کړو ته لاسرسی ولري او بشري مرستې په خوندي او بې پرې توګه اړمنو خلکو ته ورسېږي.
د افغانستان د چارو لپاره د برېتانیا ځانګړي استازي له پاکستان سره د تاوتریخوالي د کمولو او خبرو اترو غوښتنه او په دې یې ټینګار کړی، چې هېڅ نظامي حل لار شتون نه لري.
هغه د بشري مرستو د لېږد لپاره د سرحدي لارو د بیا پرانستو په بېړنۍ اړتیا ټینګار کړی او خبرداری یې ورکړی، چې د محدودیتونو دوام کولی شي له یو میلیون ډېرې ښځې او ماشومان د خوړو له مهمو مرستو او روغتیايي خدماتو بې برخې کړي.
