د افغانستان د استازو جرګې پخوانی غړی بکتاش سیاوش ویلي، اروپايي پارلمان، افغانستان کې «د جنسیتي توپیر او طالبانو د ترهګرو سازمان په توګه د رسمیت پېژندلو» درخواست څېړي.
رخشانه: سیاوش نن (سه شنبې د غوايي ۱۵ مه) په خپله فسبوک پاڼه د یوه پوسټ په خپرولو سره لیکلي، اروپايي پارلمان، د دې پارلمان مخې ته، د ده د څو ورځني پرلټ څخه وروسته، د ده او بشري حقونو د نورو فعالانو غوښتنې ته ځواب ورکړی دی.
د افغانستان د ولسي جرګې دغه غړي زیاته کړې، د هغه رسمي لیک له مخې، چې د اپریل ۲۶ د اروپايي ټولنې د عمومي منشي په استازیتوب صادر شوی، دا درخواست، د اروپايي پارلمان د عریضو کمېتې ته راجع شوی او د څېړلو په حال کې دی.
هغه لیکلي دي: «د بروکسل او سټراسبورګ ښارونو کې د څو ورځو پرلټونو او د زرګونو لاسلیکونو راټولولو وروسته، اروپايي پارلمان «افغانستان کې د جنستي توپیر په رسمیت پېژندلو او طالبانو د ترهګر سازمان په توګه د اعلانولو» عریضي د ثبت کولو خبر ورکړی دی.
بکتاش سیاووش شاوخوا میاشت وړاندې هېواد کې د افغان ښځو او نجونو د حقونو د دفاع لپاره د اروپايي ټولنې د پارلمان مخې ته د پرلټ خېمه وهلې وه او په افغانستان کې یې د جنسیتي توپیر په رسمیت پېژندلو غوښتنه کړې وه.
هغه د اروپايي ټولنې له پارلمانه غوښتي وو، چې له طالبانو سره د اړیکو عادي کولو څخه ډډه وکړي او دا ډله په «رسمي توګه» د یوه ترهګر سازمان په توګه په رسمیت وپېژني.
طالبانو د ۲۰۲۱ کال په اګست کې واک ته تر بیا رسېدو وروسته، هېواد کې د ښځو او نجونو پر بنسټیزو حقونو او خپلواکیو سخت او شدید محدودیتونه لګولي دي.
په تېرو نېږدې پنځو کلونو کې په وار وار د بشري حقونو فعالانو او معترضو ښځو، د ښځو او نجونو په وړاندې د طالبانو محدودیتونه د جنسیتي توپیر بېلګه بللې او د نړیوالې ټولنې له خوا یې د هغې په رسمیت پېژندلو غوښتنه کړې ده.
