بدخشان کې سیمه ییزې سرچینې وايي، د دې ولایت راغستان ولسوالۍ کې یوه ماشومه نجلۍ په بې رحمه ډول وژل شوې ده.
رخشانه: یوې باوري سرچینې ویلي، دا پېښه د تېرې جمعې په ورځ (د غوايي ۱۰ مه) د راغستان ولسوالۍ «خلدسک» کلي کې رامنځ ته شوې ده.
د سرچینې په وینا، دا نجلۍ ۱۲ کلنه وه او څښلو اوبو راوړولو لپاره له کوره وتلې وه.
سرچینې زیاته کړې، د هغې جسد نیم ساعت وروسته، د اوبو د څاه تر څنګ د مور او خور له خوا پیدا شوی دی.
د سرچینې له قوله، دا ماشومه نجلۍ د درې کسانو له خوا تر برید لاندې راغلې او له وهلو ټکولو وروسته یې ژوند بایللی دی.
د دې ماشومې د وژنې انګېزه جنسي کارونه ویل شوې ده.
د دې پېښې په تړاو یو تن نیول شوی دی.
دا په داسې حال کې ده، چې نن سهار هم بدخشان ولایت کې یوه ښځه د ناپېژانده وسله والو کسانو په ډزو وژل شوې ده.
په وروستیو لسو ورځ کې هېواد کې د ښځو او نجونو د وژنې پېښې په بې مخینې توګه زیاتې شوې دي.
د رخشانې رسنۍ د راپورونو له مخې، لږ تر لږه څلور ښځې او نجونې، په تخار، دایکنډي او بدخشان ولایتونو کې د خپلو کورنیو د غړو له خوا وژل شوې دي.
د ښځو هدفي وژنې د بشري حقونو د فعالانو او بنسټونو د سختې اندېښنې لامل شوې دي.
دې بنسټونو طالبان تورن کړي، چې د دې پېښو عاملین نه تعقیبوي او د هغه څه له دوامه یې اندېښنه ښودلې، چې «د ښځو وژنه» بلل کېږي.
