افغانستان کې د ملګرو ملتونو د ماشومانو ملاتړی صندوق (یونیسف) وايي، په ۲۰۲۶ کال کې به شاوخوا ۲۱.۹ میلیونه وګړي بشري مرستو ته اړتیا ولري.
رخشانه: دې بنسټ نن (دوشنبې د غوايي ۲۱ مه) په خپله اېکس پاڼه لیکلي، افغانستان کې بشري مرستو ته اړمن کسان له ۱۱.۶ میلیونه زیات ماشومان دي.
د ملګرو ملتونو د ماشومانو ملاتړی صندوق وايي، افغانستان په ۲۰۲۶ کال کې د نړۍ یو له سختو بشري بحرانونو څخه پر ځای پاتې دی.
د یونیسف په وینا، مخ پر زیاتېدونکۍ ناامنۍ، په پراخه کچه د خوړو نه خوندیتوب، د ګڼ شمېر کډوالو راستنېدل، وچکالي او پرلپسې طبیعي پېښو دا فشارونه لا زیات کړي دي.
دې بنسټ له ټولنیز ژوند نه د ښځو او نجونو منظم محرومیت ته په اشارې ویلي، دې محدودیتونو زیان مننه ژوره کړې او اړینو خدماتو ته لاسرسی لنډوي.
د ملګرو ملتونو د ماشومانو ملاتړي ضندوق زیاته کړې، نېږدې ۴۵ سلنه نفوس په غیر متناسب ډول د خوارځواکۍ، ناروغیو، امنیتي خطرونو، زده کړې او اساسي خدمتونو ته له محدود لاسرسي اغېزمن شوي دي.
یونیسف ویلي، شدیدو بارانونو او ناڅاپي سېلابونو راوتلو، په ۳۱ ولایتونو، ۱۶۵ ولسوالیو او ۵۴۶ کلیو کې زیانونه اړولي او له ۷۳ زره او ۳۰۰ څخه زیات وګړي له دې پېښو اغېزمن شوي دي.
دا بنسټ وايي، په هېواد کې د سختو بارانونو او سېلابونو راوتلو له امله، ۹۳ تنو ژوند بایللی او ۱۸۱ تنه نور ټپیان شوي دي.
د یونیسف د اټکلونو له مخې، په ۲۰۲۶ کال کې ۷.۱ میلیون ماشومان بېړنیو ښوونیزو مرستو ته اړتیا لري.
