ملګرو ملتونو وايي، افغانستان کې لوږه زیاته شوې او له ۱۳.۸ میلیونه زیات افغان وګړي، د خوړو له سخت کمښت سره مخ دي.
رخشانه: دې بنسټ نن (سه شنبې د غوايي ۲۲ مه) د یوې اعلامیې په خپرولو سره لیکلي، د خوړو د کمښت ډېر زیان ښځې او ماشومان ګالي.
د خوړو نړیوال پروګرام خبرداری ورکړی، چې په دې هېواد کې له ۱۳.۸ میلیونه زیات کسان د خوړو له سخت کمښت سره مخ دي، چې ډېر زیان یې ښځې او ماشومان ګالي.
افغانستان کې د خوړو نړیوال پروګرام مدیر جا آیلیف ویلي، په دغه هېواد کې کابو پنځه میلیونه ماشومان او امیدواره یا شیدې ورکوونکې ښځې په خوارځواکۍ اخته دي.
ملګرو ملتونو زیاته کړې، افغانستان له اقتصادي پاشل کېدو، د کاري فرصتونو له لاسه ورکولو او اقلیمي ټکانونو سره مخ دی.
دا بنسټ وايي، دې هممهاله فشارونو د خوړو ځانګړې زېرمې، چې په خوارځواکۍ د اخته ښځو او ماشومانو د ښه والي لپاره کارېدې، کمې کړې دي.
افغانستان کې د ملګرو ملتونو د ماشومانو ملاتړي صندوق (یونیسف) هم نن اعلان کړی، چې د هېواد د نورو ټولو سیمو په پرتله د خوارځواکۍ کچه، زابل، کونړ، سمنګان او بادغیس ولایتونو کې لوړه ده.
دې بنسټ په خپله اېکس پاڼه لیکلي دي، چې لومړی زر ورځې، د تغذیې لپاره تر ټولو بحراني دوران دی.
یونیسف ویلي، ۶۶ زره کورنیو د خپلو خوړو د اړتیاوو پوره کولو لپاره نغدي مرستې تر لاسه کړي دي.
