هرات ښار کې ځايي سرچینې ادعا کوي، چې طالب استخباراتو یوه ځوانه ښځه چې د خبریالۍ مخینه لري، د دې ښار له مرکز څخه نیولې او نامعلوم ځای ته یې وړې ده.
رخشانه: د دې ښځې یوه نېږدې خپلوان رخشانۍ رسنۍ ته ویلي، چې هغه نن سهار (چهارشنبې د غوايي ۲۳ مه) د هرات ښار د «نمبریک» سیمې څخه نیول شوې ده.
سرچینې ویلي، دا ښځه ۲۷ کلنه ده او حبیبه صالحي نومېږي. هغه د تېرې اوونۍ د دوشنبې په ورځ د خپلې کورنۍ د لیدو لپاره له ترکیې هېواد ته راستنه شوې وه.
سرچینې زیاته کړې، چې هغه نن سهار هرات ښار ته د تګ پر مهال د طالبانو د استخباراتو له خوا نیول شوې او نامعلوم ځای ته لېږدول شوې ده.
همدارنګه سرچینې ویلي، دا ځوانه ښځه، د طالبانو واک ته تر رسېدو مخکې، هرات ښار کې د «دنیايي نو» تلوېزیون د یوې خپرونې مخ ته وړونکې وه.
د سرچینې د وینا له مخې، دا ځوانه ښځینه خبریاله او د ټولنیزو شبکو فعاله وه او د یوې ترکي رسنۍ سره یې د خبریالې په توګه فعالیت کاوه.
رخشانه رسنۍ د دې ښځې د خبریالۍ پخلی نه شي کولی.
تر اوسه معلومه نه ده، چې دا ځوانه ښځه په څه دلیل نیول شوې او چېرته لېږدول شوې ده.
سرچینې ویلي، د دې ښځې خپلوان د هغې د پیدا کولو لپاره هرات کې د طالبانو امنیتي ارګانونو ته ورغلي، خو دې ډلې یې له نیولو بې خبري ښودلې ده.
د سرچینې په وینا، د طالبانو استخباراتو هرات ښار کې د دې ښځې دوه تنه خپلوان، چې د هغې د پیدا کولو په لټه کې وو او دې ادارې ته یې مراجعه کړې وه، وهلي ډبولي او سپکاوی یې ورته کړی دی.
تر اوسه هرات کې طالب چارواکو په دې اړه څه نه دي ویلي.
