بادغیس کې سیمه ییز طالب چارواکي وايي، د دې ولایت مرکز قلعه نو ښار کې یوې ښځې، د خپل تنکي زوی د غیر قصدي ډزو له امله ژوند بایللی دی.
رخشانه: بادغیس کې د طالبانو د امنیه قوماندانۍ ویاند صدیق الله صدیقي ویلي، دا پېښه نن (پنشنبې د غوايي ۲۴ مه) له ماسپښين وروسته، د قلعه نو ښار د دویمې ناحیې په «قصاب» سیمه کې رامنځ ته شوې ده.
هغه زیاته کړې، دې ښځې شاوخوا ۴۵ کاله عمر درلود او په تېروتنې سره د خپل تنکي زوی په ډزو وژل شوې ده.
د دې ښځې زوی شاوخوا ۱۴ کاله عمر لري.
صدیقي ویلي، پېښه هغه مهال رامنځ ته شوې، چې دې تنکي هلک په غیرقصدي توګه پر خپله مور د کلاشنکوف ډزې کړې او هغه یې وژلې ده.
هغه د طالب ځواکونو له خوا نیول شوی دی.
طالبانو ویلي، د دې ښځې د وژل کېدو دوسیه عدلي او قضايي ارګانونو ته سپارل شوې ده.
