د جوزجان ولایت مرکز شبرغان ښار کې پر یوه کور د ناپېژانده وسله والو کسانو په برید کې، د یوې ښځې او څلورو ماشومانو په ګډون د یوې کورنۍ پنځه غړي وژل شوي او دوه نور ماشومان ټپیان شوي دي.
رخشانه: جوزجان کې د طالبانو امنیه قوماندانۍ ویلي، دا پېښه (د غوايي ۲۴ مه) د پنشنبې په شپه ۱۲ بجې د شبرغان ښار د څلورمې امنیتي حوزې اړوند د «پمپ خانه» سیمه کې رامنځ ته شوې ده.
د طالبانو امنیه قوماندانۍ په یوه خبرپاڼه کې لیکلي، ناپېژانده وسله والو د شپې له تیارې په ګټې اخیستې، د استوګنې یوه کور ته د ننه شوي او د کلاشنکوف په ډزو یې د دې کورنۍ پنځه غړي وژلي او دوه نور یې سخت ټپیان کړي دي.
د دې پېښې قربانیان، یوه ښځه، یو هلک او درې نجونې دي او دوه نور هلکان ټپيان شوي دي.
په ورته وخت شبرغان ښار کې سرچینې د دې خبر په تایید سره رخشانې رسنۍ ته وايي، وسله وال کسان د طالبانو د پولیسو په یونیفورم کې دغه کور ته ننوتي او وروسته یې د کورنۍ په غړو ډزې کړې دي.
د سرچینو په وینا، دا پېښه د سرپل بندر ته نېږدې رامنځ ته شوې ده.
د دې پېښې د ټپیانو روغتیايي حالت نازک ښودل شوی دی.
جوزجان کې د طالبانو د امنیه قوماندانۍ په خبرپاڼه کې راغلي، د دې پېښې په تړاو دوه تنه نیول شوي دي.
طالبانو ویلي، د دې پېښې د رامنځ ته کېدو علت تر اوسه څرګند نه دی.
