ډیلي مېل ورځپاڼې په یوه راپور کې لیکلي، طالبانو بیا واک ته تر رسېدو کابو څلوېشت ورځې وروسته، کابل کې یوه ښځنه نظامي نیولې او په وحشتناکه توګه یې شکنجه کړې ده.
رخشانه: دې ورځپاڼې نن (شنبې د غوايي ۲۶ مه) په خپل راپور کې د یوې پخوانۍ ښځینه نظامي شکریې برخلیک د «طالبانو تر واک لاندې د دوزخ ژوند» بیان کړی دی.
د ډیلي مېل په راپور کې راغلي، دا ښځه د افغانستان د پخوانۍ ملي اردو غړې او په دفاع وزارت کې یې دنده درلوده.
د راپور له مخې، دغې ۳۳ کلنې ښځې شاوخوا لس کاله د افغانستان په پخواني ملي دفاع وزارت کې کار کړی وو، د کابل له نسکورېدو څلوېښت ورځې وروسته، د طالب جنګیالیو له لوري نیول کېږي او بندي کېږي.
طالبان شکریه د «اسلام سره د خیانت او له بهرنیو سره همکارۍ» په تور او پلار یې هم نیسي. هغوی په کابل کې یوې غیر رسمي بند خونې ته لېږدول کېږي. دا ډله په بند خونه کې شکریه سخته شکنجه کوي او زنګنونه یې ورماتوي.
دې ښځې ډیلي مېل ورځپاڼې ته ویلي، طالبانو په بند خونه کې هغې ته توهین او سپکاوی کړی او «هغې ته یې خائینه، کافره او غلامه» ویلي دي.
شکریې ویلي، د طالبانو له زندانه تر خوشي کېدو وروسته، له خپلې کورنۍ سره په قاچاقي ډول پاکستان ته تښتي. هغې ویلي، تر اوسه د زندان د شکنجې له دردونو رنځېږي او پر نورو درملو سربېره، د ژورخفګان درمل هم کاروي.
دې ښځې زیاته کړې، د طالبانو په مخکنۍ دوره کې یې پلار د خلکو په وړاندې په دورو وهل شوی، مور یې ډبول شوې او ۱۷ کلنه ترور یې په جبري توګه د طالبانو یوه سرتېري ته نکاح کړل شوې ده.
د هېواد د پخواني پوځ دغه غړې چې دا مهال په پاکستان کې ژوند کوي، اوس په یوه امریکايي هېواد کې د پناه اخیستو وېزې تر لاسه کولو ته په انتظار ده.
طالبانو په تېرو نېږدې پنځو کلونو کې د هېواد د پخواني پوځ سلګونه کارکوونکي نیولي، شکنجه کړي او لسګونه نور یې وژلي دي.
