د «عدالت غوښتوونکو ښځو غورځنګ» غړو د طالبانو د «زوجینو جلاوالي» اصولنامې د توشېح په غبرګون کې ویلي، د ماشومتوب واده، له بشري حقونو ښکاره سرغړونه او د ښځو او ماشومانو په وړاندې یو ډول منظم تاوتریخوالی دی.
رخشانه: د دې اعتراضي غورځنګ غړو نن (سه شنبې د غوايي ۲۹ مه) په یوه اعلامیه کې لیکلي، افغان ښځې یوازې له خپلو اساسي حقونو نه دي محرومې شوې، بلکې په سیستماتیک ډول له ټولنې حذفېږي.
د «عدالت غوښتوونکو ښځو غورځنګ» په اعلامیه کې راغلي، د ښځو په وړاندې د طالبانو هدفي محدودیتونه «د یوه منظم جوړښت یوه برخه، چې ښځې د جبري چوپتیا او حذف کېدو خوا ته بیايي.»
د دې اعتراضي غورځنګ غړو زیاته کړې، پر دې محدودیتونو سربېره، په پراخه کچه د ښځو ځپل، د ماشومتوب واده عادي کول او مشروعیت ورکولو، په هېواد کې د زرګونو نجونو ژوند له منځه وړی دی.
دوی د طالبانو له لوري د زوجینو جلاوالي اصولنامې توشېح او د ماشومتوب واده په رسمیت پېژندلو ته په اشارې ویلي، د دې قانون توشېح کول له بشري حقونو ښکاره سرغړونه او د ښځو او ماشومانو په وړاندې یو ډول منظم تاوتریخوالی دی.
د «عدالت غوښتونکو ښځو غورځنګ» غړو ویلي، هغه څه چې نن په افغان ښځو تحمیلېږي، یوازې تبعیض نه دی، بلکې د «جنسیتي توپير» یو ډول دی، هغه سیستم چې د ښځو په حذفولو، کابو کولو او بې غږه کولو جوړ شوی دی.
هغوی له رسنیو، د بشري حقونو له بنسټونو او نړیوالې ټولنې غوښتي، چې د افغان ښځو ځپنه عادي ونه بولي او د دې وضعیت په وړاندې چوپتیا غوره نه کړي.
د زوجینو د جلاوالي اصولنامه د تېرې اوونۍ د طالبانو د مشر له خوا توشېح شوه. په دې سند کې ماشومانه ودونه په رسمیت پېژندل شوي.
د طالبانو د مشر له لوري د دې قانون توشېح کېدو، د بشري حقونو د بنسټونو په ځانګړې توګه د ښځو او ماشومانو د حقونو د فعالانو اندېښنې راپارولې دي.
