کونړ کې سیمه ییزې سرچینې وايي، د دې ولایت «چپه دره» ولسوالۍ کې یو ماشوم د لامبو پر مهال سیند کې ډوب شوی او ژوند یې له لاسه ورکړی دی.
رخشانه: کونړ کې دوه محلي سرچینو ویلي، دا پېښه نن مازیګر (چهارشنې د غوايي ۳۱ مه) د چپه درې ولسوالۍ «کنډی» کلي کې رامنځ ته شوې ده.
د سرچینو په وینا، دا ماشوم د لامبو وهلو پر مهال اوبو کې ډوب او لادرکه شوی دی.
سرچینو زیاته کړې، دا ماشوم هلک او اته کاله عمر یې درلود.
د کورنۍ غړي او د سیمې یو شمېر اوسېدونکي د دې ماشوم د جسد موندلو په لټه کې دي، خو له تېرو ورځو راهیسې د هغه د جسد په موندلو نه دي توانېدلي.
د دې ماشوم د کورنۍ غړو د سیند غاړې سیمو له اوسېدونکو غوښتي، تر څو یې د جسد په موندلو کې همکاري ورسره وکړي.
کونړ کې ځايي طالب چارواکو تر اوسه د دې ماشوم د ډوبېدو په اړه څه نه دي ویلي.
هر کال د پسرلي په موسم کې د سیندونو د اوبو کچې د پورته کېدو له امله ورته پېښې، د هېواد په یو شمېر ولایتونو کې رامنځ ته کېږي.
