د افغانستان لپاره د برېتانیا ځانګړي استازي ریچارد لیندسي، کابل ته د خپل سفر پر مهال ویلي، د افغانستان د راتلونکي ثبات او سوکالۍ لپاره د ښځو او نجونو بشپړ ګډون خورا مهم دی.
رخشانه: د لیندسي په اعلامیه کې چې نن (پنشنبې د غوايي ۳۱ مه) خپره شوې، له افغان ښځو او نجونو، په ځانګړې توګه د زده کړې او ټولنیز ګډون په برخه کې د برېتانیا په ملاتړ ټينګار شوی دی.
بیانیه کې راوړل شوي، چې ده کابل ته د خپل سفر پر مهال له طالب چارواکو او یو شمېر ښځو او د مدني ټولنو له استازو سره لیدنې او خبرې اترې کړې دي.
لیندسي په دې لیدنو کې ټینګار کړی، چې «د افغان ښځو او نجونو امنیت، هوساینه او ګډون ته وده ورکول، د افغانستان لپاره د برېتانیا یو مهم لومړیتوب دی.»
همدارنګه د افغانستان لپاره د برېتانیا ځانګړي استازي د بشري مرستو په اړه، چې د پاکستان سره د پولې تړلو له امله درېدلې، خپله اندېښنه ښودلې ده.
هغه خبرداری ورکړی، چې دې ځنډ له یو میلیون زیاتې افغان میندې او ماشومان د خوارځواکۍ له خطر سره مخ کړي او پراخې انساني پایلې به له ځان سره ولري.
هغه د بشري مرستو لپاره د پولو د خلاصېدو غوښتنه او زیان لیدلو ملکي وګړو لپاره انساني مرستو ته د ډاډمن او دوامداره لاسرسي په خاطر د تل پاتي اوربند په رامنځ ته کولو ټينګار کړی دی.
لیندسي ویلي دي: «دا سفر یو مهم فرصت وو، تر څو د راتلونکې په اړه د افغان ښځو تجربې، ستونزې او هیلې نېغې واورم.»
د افغانستان لپاره د برېتانیا ځانګړي استازي زیاته کړې، د افغان ښځو او نجونو غږونه باید د هېواد د راتلونکې او نړیوالې ټولنې د دوامداره ښکېلتیا په جوړلو کې رول ولري.
هغه ټینګار کړی چې «د افغانستان د راتلونکي ثبات او سوکالۍ لپاره، امنیت، هوساینه او د ښځو او نجونو بشپړ ګډون اړین دی. ښځو ته کارموندنه او په ټولو سکتورونو کې د ګډون چمتو کول نه یوازې د حقونو خبره ده، بلکې د هېواد لپاره یوه اقتصادي اړتیا هم ده.»
