د افغان خبریالانو مرکز(AFJC) د طالبانو د استخباراتو له خوا د بامیان راډیو دفتر تړل په کلکه وغندل.
رخشانه: دې مرکز نن (پنشنبې د غوايي ۳۱ مه) په یوه اعلامیه کې له قید و شرط پرته د دې سیمه ییزې رسنۍ د بېرته پرانستو غوښتنه کړې ده.
نن سهار بامیانو کې درې سیمه ییزه سرچینو رخشانې رسنۍ ته ویلي و، چې طالب استخباراتو د روانې اوونۍ د یکشنبې په ورځ د بامیان په «شهر نو» سیمه کې د بامیان راډیو په دفتر یرغل کړی او دا رسنۍ یې وتړله.
بامیانو کې د طالبانو د ځايي ادارې ویاند محلي رسنیو ته ویلي وو، د دې غږیزې رسنې دفتر د جواز د نه تمدیدولو له آمله، مهرولاک شوی دی.
د افغان خبریالانو مرکز ویلي، د بامیان راډیو استازي څو ځلې د دې رسنۍ د جواز د تمدید غوښتنه کړې وه، خو د طالبانو له لوري یې غوښتنه رد شوې ده.
بامیان سیمه ییزه راډیو په دې ولایت کې لومړنۍ خصوصي رسنۍ ده، چې په ۱۳۸۲ لمریز کال یې د ۸۹.۷ اېف اېم څپو باندې خپرونې پیل کړې.
دې غږیزه رسنۍ په خپل تېر۲۳کلن فعالیت کې، کلتوري، هنري، اقتصادي او سیاسي خپرونې د بامیانو خلکو ته وړاندې کولې.
د بامیان راډیو په تړل کېدو سره اوس یوازې د نیسیم خصوصي راډیو په دې ولایت کې فعالیت لري.
د افغان خبریالانو مرکز له طالبانو غوښتي، چې د بامیان راډیو جواز تمدید کړي، دفتر یې پرانیزي او دې رسنۍ ته د فعالیت اجازه ورکړي.
دې مرکز لیکلي، د طالبانو د محدودیتونو له امله په تېرو پنځو کلونو کې لسګونه رسنۍ په هېواد کې له فعالیت نه پاتې شوې دي.
د افغان خبریالانو مرکز لیکلي، یوازې په ۱۴۰۴ لمریز کال کې د لږ تر لږه ۲۱ محلي تلوېزیونونو فعالیت، د ساه کښو موجوداتو د خپرولو له امله درولی دی.
همدارنګه طالبانو په تېر یوه کال کې اته رسنۍ او رسنیز بنسټونه د رسنیزو پالیسیو نه مراعت کولو له امله، اړ کړې، چې فعالیت ودروي او د لږ تر لږه ۱۰ خبري او رسنیزو بنسټونو جوازونه یې لغوه کړي دي.
