غر ختوونکې ذکیه احمد، لومړنۍ افغان مېرمن ده، چې د نړۍ تر ټولو لوړه څوکه «اروست» یې فتح کړه.
رخشانه: د ذکیه احمد خور مژګان مهتر، په خپله فسبوک پاڼه اورست څوکې ته د هغو د ختو خبر ورکړی دی. په ورته وخت، «اورست داټ لایف» هم راپور ورکړی دی، چې ذکیه احمد لومړنۍ افغان مېرمن ده، چې اورست څوکې ته خېژي.
د «اورست ډاټ لایف» د راپور له مخې، ذکیه احمد له یو شمېر نورو غر ختوونکو له یوې ډلې سره یو ځای، له هغې جملې کرسټین هریلا له روسیې څخه د مي په ۲۱ مه نېټه اورست څوکه فتحه کړې ده.
«اورست ډاډ لایف» لیکلي دي: «ذکیه احمد لومړنۍ افغان مېرمن ده، چې د نړۍ پر بام ودرېده.»
د ذکیه احمد خور هم لیکلي دي: «خور مې اورست څوکې ته په ختو د لومړۍ افغان مېرمنې په توګه تاریخ جوړونکې شوه. د هغې سفر یوازې څوکې ته رسېدل نه وو، بلکې د میلیونونو هغو نجونو او ښځو لپاره د زړورتیا، استقامت او امید سمبول دی، چې له محدودیتونو ور ها خوا خوبونه ویني.»
ذکیه احمد د سږ کال په وري میاشت کې له رخشانې رسنۍ سره په خبرو کې ویلي وو، غواړي د اورست څوک د افغان نجونو په نوم فتحه کړي.
هغې ویلي وو، د غر ختلو پر مهال چې هر چېرته دمه کوي، د افغان نجونو برخلیک ته فکر کوي، هغه ځای چې د دې په وینا، طالبانو د افغان نجونو برخلیک په ځنځیرونو تړلی دی.
۳۱ کلنه ذکیه، د افغانستان د غزني ولایت جاغوري ولسوالۍ کې زېږېدلې ده. هغې د طالبانو په واکمنېدو سره په ۲۰۲۲ میلادي کال کې له خپلې کورنۍ سره یو ځای استرالیا ته کډه وکړه.
اورست څوکه د ځمکې تر ټولو لوړه څوکه ده او هغې ته ختل آسانه کار نه دی. تر اوسه پورې ډېرو غر ختونکو دغه څوکې ته د ختو پر مهال ژوند له لاسه ورکړی دی.
ذکیه احمد د اورست څوکې له فتح کولو وړاندې، فرانسه کې د «مون بلان» نپال کې «مرا پیک» هند کې د «ناندا دوی» او د افغانستان بدخشان ولایت واخان ولسوالۍ کې د «نوشاخ» څوکې هم فتحه کړې وې.
«نوشاخ» د افغانستان تر ټولو لوړه څوکه ده. دا څوکه د بدخشان ولایت «واخان» ولسوالۍ کې د سمندر له سطحې ۷ زره او ۴۰۲ متره لوړوالی لري.
ذکیه احمد رخشانې رسنۍ ته ویلي وو، چې د اورست څوکې فتح کولو لپاره یې په کال ۲۰۲۵ کې په دوامداره توګه تمرین کړی دی.
هغې همدارنګه د دې ختلو د لګښت یوه برخه د «ګوفنډ مي» بسپنې کمپاین له لارې راټوله کړی وه.
د اورست څوکې فتحه کول په داسې حال کې د ذکیه احمد په نوم کېږي، چې طالبانو افغانستان کې د ښځو لوبې بندې کړې دي.
