افغانستان کې د ملګرو ملتونو د وګړو صندوق (UNFPA) ویلي، شاوخوا ۱۵ زره افغان ښځې او نجونې له «ولادي فیستول» څخه کړېږي.
رخشانه: دې بنسټ نن (شنبې د غبرګولي ۲ مه) د «ولادي فیستول» پای ته رسولو نړیوالې ورځې سره سم پر خپله اېکس پاڼه لیکلي، افغانستان په ولادي فیستول د اخته هېوادونو له نظره په نړۍ کې پنځم هېواد دی.
د ملګرو ملتونو د وګړو صندوق په اعلامیه کې راغلي، افغانستان کې کابو ۱۵ زره ښځې او نجونې له ولادي فیستول څخه کړېږي.
ملګرو ملتونو زیاته کړې، دغه زیان د ښځو او نجونو د معلولیت او ټولنیزې انزوا لامل کېږي.
دې بنسټ ټينګار کړی، ولادي فیستول ته د پای ټکي اېښودلو او مخنیوي لپاره، روغتیايي خدمات، خوندي جراحي، تجهیزات او امکانات اړین دی.
ولادي فیستول، له اوږده اوسخت زېږون څخه خورېدونکی زیان دی، چې د اوږد مهال روغتیايي ستونزو او ټولنیز شرم لامل کېږي.
ډېرې مېرمنې، چې له زېږون وروسته د ولادي فیستول سره مخ کېږي، کار نه شي کولی او له سختو رواني فشارونو سره مخ وي. هغوی تر ډېره د شرم، تخصصي خدماتو ته د نه لاسرسي او د درملنې له ځایه د نه خبرتیا، له امله په پټه کړېږي.
د روغتیا نړیوال سازمان څه موده وړاندې په یوه راپور کې لیکلي وو، افغانستان کې د میندو مړینه کچه په هرو ۱۰۰ زرو ژوندیو زېږونونو کې ۵۲۱ مورده ده.
