ننګرهار کې سیمه ییزو سرچینې وايي، د کابل – جلال آباد پر لویه لار په یوه ترافیکي پېښه کې، د درې ماشومانو، یوې ښځې او یو سړي په ګډون پنځو تنو ژوند له لاسه ورکړی دی.
رخشانه: ننګرهار کې دوه سیمه ییزه سرچینو ویلي، دغه پېښه پرون جمعه (د غبرګولي اوله) د «سورۍ تېږې» په سیمه کې رامنځ ته شوې ده.
د سرچینې په وینا، دغه پېښه مهال رامنځ ته شوې، چې د سروبي ولسوالۍ د اوسېدونکو یو موټر سیند ته لوېدلی او په کې سپاره کسان ټول وژل شوي دي.
سرچینې زیاته کړې، د دې پېښې قربانیان ټول د یوې کورنۍ غړي وو.
د دې ترافیکي پېښې د رامنځ ته کېدو لامل نه دی معلوم شوی.
د دوه ماشومانو او د هغوی د پلار جسد د سیمې د خلکو له خوا له اوبو څخه را ایستل شوي، خو د یوه ماشوم او مور جسدونه یې تر اوسه نه دي موندل شوي.
د دې پېښې د قربانیانو هویت، جنسیت او عمر هم نه دی معلوم.
په یوه بله پېښه کې بیا، د ننګرهار مرکز جلال آباد ښار کې سیمه ییزه سرچینې وايي، د ښار په پنځمه ناحیه کې یو ماشوم برېښنا نیولی او ژوند یې له لاسه ورکړی دی.
د دې ماشوم د کورنۍ یوه غړي ویلي، دا پېښه نن (شنبې د جوازه ۲ مه) د جلال آباد ښار د پنځمې ناحیې اړوند «کچه ګړۍ» سیمه کې رامنځ ته شوې ده.
د سرچینې په وینا، دغه ماشوم د درملنې لپاره د ننګرهار حوزوي روغتون ته لېږدول شوی، خو ډاکترانو یې له درملنې ناهیلي شوي دي.
معلومه نه ده، چې دغه ماشوم څه ډول برېښنا نیولی دی.
تر اوسه ننګرهار کې سیمه ییزه طالب چارواکو د دواړو پېښو په اړه څه نه دي ویلي.
