د منځني ختیځ او شمالي افریقا لپاره د برېتانیا د بهرنیو چارو مرستیال وزیر هامېش فالکونر، د طالبانو د زوجینو جلاوالي اصولنامې په غبرګون کې وايي، د ماشومتوب واده تل او په هر ځای کې له بشري حقونو ښکاره سرغړونه ده.
رخشانه: فالکونر نن «دوشنبې د غبرګولي ۴ مه) په خپله اېکس پاڼه د یوه پوسټ په خپرولو سره لیکلي، چې د طالبانو د زوجینو د اصولنامې له توشېح « حیران او ورېرېدلی» دی.
هغه زیاته کړې، دا سند په افغانستان کې د ماشومتوب واده ته جواز ورکوي.
فالکونر وايي، له نجونو باید ساتنه وشي، نه دا چې د زیان او کړاو زغملو ته اړویستل شي.
د زوجینو جلاوالي اصولنامه تېره اوونۍ د طالبانو د مشر له خوا توشېح شوه. په دې سند کې د ماشومتوب واده په قانوني توګه په رسمیت پېژندل شوی دی.
د طالبانو د مشر له خوا د دې قانون توشېح، د بشري حقونو د بنسټونو، په ځانګړې توګه د ښځو او ماشومانو د حقونو د فعالانو غبرګونونه راپارولي دي.
فعالان دا قانون له بشري حقونو ښکاره سرغړونه او د ښځو او ماشومانو په وړاندې یو ډول سیستماتیک تاوتریخوالي بولي او د دې قانون د لغوه کولو غوښتنه کوي.
طالبانو د بشري حقونو د فعالانو د غبرګون او د بشري حقونو د بنسټونو اندېښنو ته په ځواب کې، د دې قانون توشېح کېدل، د افغانستان کورنۍ مسائل وبلل وايي، دا په نړیوالو بنسټونو پورې اړه نه لري.
