ملګرو ملتونو (United Nations) اعلان وکړ، چې د افغانستان د فوټبال ښځینه ملي لوبډلې پخوانۍ لوبډلمشره خالده پوپل، د نړیوال فوټبال د ۱۶ غوره څېرو په نوملړ کې شامله شوه.
رخشانه: ملګرو ملتونو نن (دوشنبې د غبرګولي ۴ مه) په خپله اېکس پاڼه د یوې پوسټ په خپرولو، د فوټبال د نړیولې ورځې سره سم، د دې کسانو نوملړ اعلان کړ.
په دې نوملړ کې د برازیل فوټبال ملي لوبډلې روزونکې کارلو آنچلوتي، د ښځو غوره لیګ او سری آ اتلې تا ایني الوکو، د انټر میلان افسانوي لوبغاړي جاویر زینټي او د افغانستان د ښځو د فوټبال ملي لوبډلې پخوانۍ لوبډلمشرې خالدې پوپل نومونه شامل دي.
ملګرو ملتونو ویلي، دا کسان د په دې خاطر معرفي شوي دي، چې د «خپل موقف او شهرت څخه په ګټنې د دوامداره پراختیايي اهدافو په اړه د پوهاوي لوړولو، د خلکو او نړۍ د کره د ښې راتلونکې لپاره د ملاتړ حق غوښتنه وکړي.»
د ملګرو ملتونو په وینا، دې کسانو د پایښت، جنسیتي برابرۍ، شمولیت او بشري حقونو د ودې لپاره د نړیوالو سفیرانو غیز رسمي رول پر غاړه اخیستی دی.»
د ملګرو ملتونو عمومي اسامبلې د ۲۰۲۴ کال په می میاشت کې د فوټبال د نړیوالې ورځې د ټاکلو په موخه پرېکړه لیک تصویب کړ، هغه پرېکړه لیک، چې د نړیوال فوټبال پراختیا، پر سوله او دیپلوماۍ د هغې اغېز او د دې ورزش لور یې د همکارۍ فضا د رامنځ ته کولو کې په رسمیت پېژني.
ملګرو ملتونو ویلي، د فوټپال شهرت او په ټوله نړۍ کې پراخ لاسرسي دا لوبه د اقلیم د عمل، روغتیا، تعلیم، شمولیت او جنستی برابرۍ په څېر مسلو کې د عامه ښکېلتیا لپاره یو پیاوړی پلټ فارم کرځولی دی.
خالدې پوپل ۲۰۰۷ میلادي کال کې د یو شمېر ښځو په همکارۍ، د افغانستان د فوټبال ښځینه ملي لوبډلې بنسټ کېښود. هغه د دې لوبډلې د لومړنۍ لوبډلمشرې په توګه پېژندل کېږي.
پوپل په ۲۰۱۱ میلادي کال کې د ښځو د حقونو د ملاتړ له امله، د ګواښونو او ټولنیزو فشارونو زیاتېدو سره، افغانستان پرېښود او ډنمارک کې مېشت شوه.
د افغانستان د فوټبال ښځینه ملي لوبډله د ۲۰۲۱ په اګست کې د طالبانو په بیا واک ته رسېدو سره وپاشل شوه. طالب ډلې د شدیدو محدودیتونو په لګولو، د ښځو لوبې بندې کړې او ویې ویل، د هېواد ټولې ښځینه ورزشي لوبډلې په رسمیت نه پېژني.
د طالبانو په بیا واکمنېدو سره د افغانستان د فوټبال ښځینه ملي لوبډلې لوبغاړي، له هېواده و وتل او اوس په اسټرالیا، برېتانیا، آلبانیا، پرتګال او امریکا کې مېشتې شوې دي.
د فوټبال نړیوال فدراسیون څه موده وړاندې اعلان وکړ، چې د افغانستان د فوټبال جلاوطنه ښځینه ملي لوبډله په رسمیت پېژني او دا لوبډله کولی شي، په نړیوالو لوبغالو کې د افغانستان په استازي توب ګډون وکړي.
