د ماشومانو د ملاتړ صندوق (یونیسف) اجرائیه مدیرې کاترین راسل، د طالبانو د طلاق قانون په غبرګون کې ویلي، د ماشومتوب واده په اړه دا قانون «د نه منلو» دی.
رخشانه: مېرمن راسل نن (چهارشنبې د غبرګولي ۶ مه) په خپله اېکس پاڼه لیکلي دي، له ماشومانو د ملاتړ صندوق (یونیسف) د طالبانو د «زوجینو جلاوالي» اصولنامې په اړه ژوره اندېښنه لري.
هغې لیکلي، هر قانون چې د نجونو د واده لپاره د نجونو چوپتیا د رضایت په توګه تفسیروي یا د ماشومتوب واده ته زمینه برابروي، «د نه منلو» وړ دی.
مېرمن راسل ویلي دي: «یونیسف د افغانستان د واکمنو چارواکو د وروستي صادر کړي فرمان څخه په ژوره توګه اندېښنه څرګندوي. په هر قانون کې چې دا ګټه نښتې وي، چې ښکاره کړي، د ماشومتوب واده مجاز ګڼي یا د نجلۍ چوپتیا د هغې د خوښې په توګه تفسیروي، د نه منلو دی.»
د زوجینو جلاوالي اصولنامه تېره اوونۍ د طالبانو د مشر له خوا توشېح شوه. په دې سند کې د ماشومتوب واده په قانوني توګه په رسمیت پېژندل شوی او ښځې له خپل مېړه نه د طلاق اخیستو لپاره باید له ګڼو حقوقي خنډونه تېرې شي.
د طالبانو د مشر له خوا د دې قانون توشېح، د بشري حقونو د بنسټونو، په ځانګړې توګه د ښځو او ماشومانو د حقونو د فعالانو غبرګونونه راپارولي دي. فعالان دا قانون له بشري حقونو ښکاره سرغړونه او د ښځو او ماشومانو په وړاندې یو ډول سیستماتیک تاوتریخوالي بولي او د دې قانون د لغوه کولو غوښتنه کوي.
طالبانو د بشري حقونو د فعالانو د غبرګون او د بشري حقونو د بنسټونو اندېښنو ته په ځواب کې، د دې قانون توشېح کېدل، د افغانستان کورنۍ مسائل وبلل وايي، دا په نړیوالو بنسټونو پورې اړه نه لري.
افغانستان کې د ملګرو ملتونو د ښځو څانګې (UN Women) پرون په یوه اعلامیه کې د طالبانو له لوري د زوجینو جلاوالي اصولنامې ته په غبرګون کې ویلي، دا سند د افغان ښځو او نجونو حقونه او خوندیتوب کمزوری کوي.
