افغان غر ختوونکې ذکیه احمد، چې په دې وروستیو کې یې د نړۍ تر ټولو لوړې څوکې ته ختلې، د افغان ښځو او نجونو په ملاتړ یو کمپاین پیل کړی دی.
رخشانه: هغې شنبې (د غبرګولي ۹ مه) په خپله انسټاګرام پاڼه د څو انځورونو په خپرولو سره، له دې ملاتړي کمپاین خبر ورکړی دی.
دې غر ختوونکې مېرمنې لیکلي، د اورست څوکۍ فتح کول، «د لارې پای نه، بلکې د هغې د سفر» تازه پیل دی.
مېرمن احمد زیاته کړې، د دې ریښتینی هدف د هغو زرګونه افغان ښځو او نجونو غږ پورته کول دی، چې په تېرو څه باندې څلورو کلونو کې له خپلو تر ټولو اساسي انساني حقونو بې برخې دي.
هغې نور هم رابللي، چې د افغان ښځو او نجونو د ملاتړ په موخه له دې سره یو ځای شي او د افغان ښځو او نجونو «لاسنیوی» وکړي.
له دې مخکې ورزش کوونکو ښځو او د ښځو د حقونو فعالانو د ملاتړو کمپاینونو په ترسره کولو، هېواد کې د نجونو او ښځو وضعیت ته د رسیدګۍ غوښتنه کړې وه.
طالبانو په تېرو کابو پنځو کلونو کې د سختو محدودیتونو لګولو سره، ښځې او نجونې خپلو تر ټولو اساسي حقونو ته له لاسرسي محرومې کړې دي.
ذکیه احمد لس ورځې وړاندې له یوې ډلې غر ختوونکو سره یو ځای، د روان میلادي کال د می په ۲۱ مه د اورست څوکه فتحه کړه.
د لومړۍ افغان مېرمنې په توګه د اورست لوړې څوکې ته د ذکیه احمد ختل، یوه تاریخي شېبه وه. هغې د روان کال په وري میاشت کې له رخشانۍ رسنۍ سره خبرو کې ویلي و، غواړي د اورست څوکه د افغان نجونو په نوم فتحه کړي.
۳۱ کلنه ذکیه د افغانستان غزني ولایت جاغوري ولسوالۍ کې زېږېدلې ده. هغه د طالبانو په واکمنېدو سره په کال ۲۰۲۲ کې، له خپلې کورنۍ سره یو ځای استرالیا ته کډواله شوه.
اورست د ځمکې تر ټولو لوړه څوکه ده او هغې ته ختل څه آسانه کار نه دی. تر اوسه پورې ډېری غر ختوونکو دې څوکې ته په ختو کې خپل ژوند له لاسه ورکړی دی.
ذکیې د اورست څوکې له فتحه کولو مخکې، فرانسه کې د «مون بلان»، نیپال کې د «مرا پیک» هند کې د «ناندا دوی» او افغانستان بدخشان ولایت کې د «نوشاخ» څوکې هم فتح کړې وې.
د ذکیه احمد له خوا د اورست څوکې فتحه کولو په ټولینزو شبکو پراخ غبرګونونه له ځان سره درلودل. هغې په داسې حال کې اورست څوکه فتحه کړه، چې طالبانو افغانستان کې د ښځو ورزش کول بشپړ بند کړي دي.
