ننګرهار کې ځايي طالب چارواکي وايي، د دې ولایت سرخ رود ولسوالۍ کې یو سره خپله مېرمن او لور وژلې او زوی یې ټپي کړی دی.
رخشانه: ننګرهار کې د طالبانو د امنیه قوماندانۍ ویاند سید طیب جواد وايي، دا پېښه پرون یکشنبې (د غبرګولي ۱۰ مه) د سرخ رود ولسوالۍ «شیخ مصري» سیمه کې رامنځ ته شوې ده.
معلومه نه ده، چې دا ښځه او لور یې د څه شي په واسطه د خاوند له خوا وژل شوې دي. د هغوی عمر او هویت هم نه دی مشخص شوی.
سید طیب جواد زیاته کړې، دا پېښه د کورني تاوتریخوالي له امله رامنځ ته شوې ده.
ننګرهار کې د طالبانو د امنیه قومانداني ویاند ویلي، تور کس د طالب ځواکونو له خوا نیول شوی او په خپل جرم یې اعتراف کړی دی.
ټپي شوی کس د درملنې په موخه روغتون ته لېږدول شوی او روغتیايي حالت یې د ډاډ وړ ښودل شوی دی.
په ورته وخت د سیمې دوه تنو اوسېدونکو د هویت پټ ساتلو سره رخشانې رسنۍ ته ویلي، دا سړی په نشه يي توکو روږدی وو.
د دوی په وینا، د دې سړي د کورنۍ اقتصادي وضعیت خراب وو او دا پېښه د بېوزلۍ او تنګ لاسۍ له امله رامنځ ته شوې ده.
د طالبانو له بیا واک ته رسېدو وروسته، د کورنیو تاوتریخوالي په پایله کې د کورنیو د غړو له خوا، د ښځو او نجونو وژنې بې مخینې زیاتې شوې دي.
