یو شمېر ناورې مېشتو افغانانو د طالبانو له خوا د زوجینو جلاوالي اصولنامې په غبرګون کې غونډه وکړه او «له قانوني سن څخه ټیټو نجونو د واده په رسمیت پېژندل» یې وغندل.
رخشانه: دغه اعتراضي غونډه پرون (یکشنبې د غبرګولي ۱۰ مه) جوړه او په کې متعرضو ښځو، د مدني ټولنې فعالانو او د بشري حقونو مدافعینو ګډون درلود.
د دې اعتراضي غونډې ګډونوالو د ښځې او مېړه د جلاوالي قانون «د کم عمره نجونو د واده د اسانتیا او په رسمیت پېژندلو لپاره د لارې هوارول» وبلل ویې ویل، دا سند د ماشومانو له حقونو ښکاره سرغړونه ده.
هغوی د عدلت غوښتنې شعارونو په ورکولو سره خبرداری ورکړ، چې د ماشومتوب واده به د ناوړه ګټې اخیستنې، له زده کړې د نجونو د محرومیت او د افغان ښځو په وړاندې د تاوتریخوالي او تبعیض لړۍ د دوام لامل شي.
د دې اعتراضي غونډې ګډنوالو ټینګار وکړ، چې د طالبانو پالیسۍ او محدودیتونه د زرګونه نجونو راتلونکې له جدي ګواښونو سره مخ کوي.
دوی همدارنګه و ویل: «له زده کړې د نجونو محرومول او په کم عمر کې واده ته د هغوی هڅول، د جوړښتي توپیر او انسانانو د اساسي حقونو ښکاره بېلګه ده.»
د دې اعتراضي غونډې ګډونوالو غوښتنه کړې، چې په ښځو او نجونو د طالبانو محدودیتونه، باید په نړیوالو بنسټونو او محکمو کې د «جنسیتي توپير» په توګه په رسمیت وپېژندل شي.
معترضینو د ناورې له دولت او نړیوالې ټولنې وغوښتل، چې «افغانستان کې د بشري حقونو د پراخې سرغړونې» په وړاندې چوپتیا غوره نه کړي او پر طالبانو د فشار راولو لپاره، له هر ډول سیاسي او حقوقي لارو چارو کار واخلي.
دوی د افغان نجونو او ښځو د حقونو د دفاع لپاره د عدلت غوښتنو هڅو پر دوام ټينګار وکړ او له نړیوالې ټولنې یې وغوښتل، چې له افغان ښځو او نجونو عملي او ګټور ملاتړ وکړي.
طالبانو په تېرو نېږدې پنځو کلونو کې د ښځو او نجونو په وړاندې، د لسګونو فرمانونو په صادرولو سره، هغوی له خپلو تر ټولو لومړنیو حقونو بې برخې کړې دي.
د طالبانو مشر شاوخوا دوه اوونۍ وړاندې د ښځې او مېړه نوی قانون توشېح کړ، هغه سند چې د بشري حقونو د څاروونکو او فعالانو په اند، پر افغان ښځو او نجونو د یوه نوي محدودیت د رامنځ ته کېدو سبب کېږي.
