یو شمېر فنلند مېشتو افغان وګړو «د هزاره ګانو د کلتور ورځ» د دې هېواد د لومړي وزیر پتري اورپو او څو نورو دولتي چارواکو په شتون کې ولمانځله.
رخشانه: دا پروګرام پرون یکشنبې د (می ۳۱ مه) د فنلنډ په ځايي وخت د «هزاره ګانو د کلتور کور» له خوا په «یارونیپه» ښار کې تر سره شو.
د «هزاره ګانو د کلتور کور» اعلامیه کې راغلي، دا پروګرام د «هزاره کلتور او تاریخ د بیا لوستلو» په موخه جوړ شو.
د فنلنډ لومړي وزیر پتري اورپو په دې پروګرام کې د هزاره ګانو د کلتور ورځې له جوړېدو په هرکلي ویلي دي، هزاره ټولنې تل زده کړې او تحصیل ته ډېر ارزښت ورکړی دی.
هغه پر دوام د طالبانو تر واک لاندې افغانستان کې د بشري حقونو وضعیت ته اشاره وکړه ویې ویل: «سره له نړیوالو بحرانونو، افغانستان باید له پامه ونه غورځول شي د خبرونو له سر څنډې ته نه کړل شي.»
د فنلنډ لومړي وزیر ویلي: «په نړۍ کې یو له سختو انساني بحرانونو په افغانستان کې دوام لري. طالبان لا هم له بشري حقونو سرغړونې کوي، پر خلکو فشار راوړي او په ورځني ژوند نوي محدودیتونه لګوي.»
هغه په افغانستان کې د ښځو او نجونو په وړاندې د طالبانو پراخو محدودیتونو ته نغوته وکړه وايي «د ښځو او نجونو حقونه ورځ تر بلې کمزوري کېږي، تاوتریخوالی او د ښځو په وړاندې تبعیض په هېڅ ډول د منلو نه دی.»
پتري اورپو ټینګار کړی، چې فنلډ کې د نړیوالې او اروپايي ټولنې د یوې برخې په توګه، د افغانستان د وضعیت ښه والي لپاره هڅې کړې او دې هڅو ته لا هم دوام ورکوي.
د یاروینپه ښاروالۍ لومړي مرستیال پیرجو کومولانین په دې پروګرام کې ویلي، هزاره ټولنه د فنلنډ هېواد د څو کلتوري ټولنې یوه فعاله برخه ده.
د نوموړي په وینا، هزاره ګانو د زده کړې، د کار بازار او ټولنیزو فعالیتونو پر لور ګامونه اخیستي او د هزاره ګانو کلتوري کور د بېلا بېلو کلتورونو تر منځ د اړیکو پل جوړ کړی دی.
