د «افغان ښځو د نوې راتلونکې غورځنګ» غړو، د طالبانو له خوا د زوجینو جلاوالي قانون توشېح ته په غبرګون کې وايي، دې ډلې د دې سند په توشېح سره، د ماشومتوب د واده لپاره لار هواره کړې ده.
رخشانه: د دې اعتراضي غورځنګ غړو، د طالبانو د زوجینو جلاوالي قانون پر توشېح اندېښنه ښودلې او هغه یې غندلی دی.
د افغان ښځو د نوې راتلونکې غورځنګ په اعلامیه کې راغلي، د افغان ښځو او انجونو وضعیت ناورین او مخ پر خرابېدو دی.
معترضو ښځو ویلي، طالبانو د زوجینو جلاوالی قانون په توشېح سره د ماشومتوب د واده لپاره لار هواره کړې او هغې ته یې مشروعیت ورکړی دی.
د دې غورځنګ غړو، دا سند د بشري او ماشومانو د حقونو ښکاره سرغړونه وبلله او د هغه پر توشېح یې اندېښنه ښودلې.
دوی د ښځو د مرموزو وژنو دوام، له زده کړو د نجونو پراخ محرومیت او د ښځو پر آزادیو او اساسي حقونو محدودیتونه، په افغانستان کې د شځو په وړاندې د جوړښتي تاوتریخوالي او سیستماتیک تبعیض څرګندوی وبلله.
معترضو ښځو ټینګار کړی، چې د طالبانو له لوري د ښخو او ماشومانو له حقونو پر سرغړاوي د چوپتیا دوام، د تاوتریخوالي، تبعیض او بې عدالتۍ عادي کول دي.
طالبانو په تېرو نېږدې پنځو کلونو کې د ښځو او نجونو په وړاندې د لسګونو فرمانونو په صادرولو سره، هغوی له خپلو تر ټولو لومړنیو حقونو محرومې کړې دي.
د طالبانو مشر شاوخوا شل ورځې وړاندې د ښخې او مېړه د جلاوالي قانون توشېح کړ، هغه سند چې د بشري حقونو د څارونکو او فعالانو په اند، د افغان ښځو او نجونو په وړاندې یې یو نوی محدودیت رامنځ ته کړی دی.
د دې سند قانون توشېح د بشر،ي حقونو د بنسټونو په ځانګړې توګه د ماشومانو د حقونو د فعالانو اندېښنې راپارولې دي. طالبانو په دې سند کې د ماشومتوب واده په رسمیت پېژندلی او د نجلۍ چوپتیا یې واده ته په رضایت تعبیر کړې ده.
