د ملګرو ملتونو د ماشومانو کمېټه، د طالبانو له خوا د زوجینو جلاوالي قانون د توشېح په غبرګون کې وايي، د ماشومتوب واده ته مشروعیت ورکول له نړیوالو بشري حقونو جدي او منظمه سرغړونه ده.
رخشانه: دې کمېتې پرون (دوشنبې د غبرګولي ۱۱ مه) ناوخته په یوه اعلامیه کې لیکلي، دې سند «د ماشومانو واده ته مشروعیت ورکړی او د نجونو چوپتیا واده ته په رضایت درک کوي.»
په دې اعلامیه کې راغلي: «د ماشومتوب واده یو زیان راوړونکی عمل ګنل کېږي او د جبري واده یو ډول دی، ځکه ماشومان په طبعي ډول واده ته د بشپړ، خپلواکه او په شعوري ډول د رضایت ورکولو توان نه لري.»
دې کمېتې ویلي دي، د طالبانو له خوا د زوجینو جلاوالي قانون «د هغو نجونو تر منځ چې بلوغ ته رسېدلې او هغه چې ودونه یې کړي توپیر کوي او دا وېشنه بلوغ ته تر رسېدو وروسته، د نجونو ودونو ته د مشروعیت ورکولو لپاره کارول کېږي.»
ملګرو ملتونو ټینګار کړی، چې بلوغیت رسېدو یا د واده کولو قانوني وړتیا لپاره بنسټ نه شي ګڼل کېدای او دا حکم د ماشومانو د حقونو کنوانسیون سره بشپړ په ټکر کې دی.
د ماشومانو د حقونو کمېتې زیاته کړې: «د ماشومتوب واده نه یوازې یو زیانمنوونکی عمل، بلکې د بشري حقونو بنستیزه سرغړونه هم ده. دا پدیده نجونې د لا ډېر تاوتریخوالي، استحصال، ژر او اجباري امیدواره کېدو، له زده کړې د محرومیت او اودږ مهاله بدني او رواني زیانونو له ګواښ سره مخ کوي.»
دې کمېټې خبرداری ورکړی «هر هغه قانوني چوکاټ کې د ماشومتوب واده عادي یا اسانه کوي، د هغوی حقونه تر پښو لاندې کوي، طبیعي کرامت یې کمزوری کوي او د هغوی د راتلونکې له خپلواکۍ فرصتونو محروموي.»
د ملګرو ملتونو د ماشومانو د حقونو کمېټې، د طالبانو له خوا د زوجینو جلاوالي قانون د دې ډلې د«د تبعیضي کړو د پراخې بېلګې یوه برخه» بللې ده.
ملګرو ملتونو د افغان ښځو او نجونو په وړاندې د طالبانو پراخو محدودیتونو ته په اشارې ویلي «دې اقداماتو میلیونه نجونې له خپلو اساسي حقونو محرومې کړې، د هغوی راتلونکی اقتصادي او ټولنیز ګډون یې کمزوری کړی او په ټول هېواد کې يې بېوزلي او نابرابري لا ژوره کړې ده.»
دې بنسټ له طالبانو غوښتي، هغه ټول اقدامات چې د ماشومانو حقونه ماتوي باید لغوه کړي او د ماشومتوب واده په ښکاره او له کوم شک پرته ممنوع کړي.
د ملګرو ملتونو د ماشومانو حقونو کمېټې له طالبانو غوښتي، چې په ټولنه کې د نجونو د زده کړې، ملاتړ، برابرۍ او بشپړ ګډون حق رعایت کړي او د ماشومانو او بشري حقونو په تړاو د افغانستان نړیوالو ژمنو ته ژمن پاتې دي.
د طالبانو مشر شاوخوا شل ورځې وړاندې د ښخې او مېړه د جلاوالي قانون توشېح کړ، هغه سند چې د بشري حقونو د څارونکو او فعالانو په اند، د افغان ښځو او نجونو په وړاندې یې یو نوی محدودیت رامنځ ته کړی دی.
